Felipa, un relámpago en la oscuridad jump’éel balts’am ku chíikbesik u kuxtal maya x-activista téetel xsindicalista Felipa Poot Tzuc (1903-1936). Meyaj tu beetaj ti’al u kaláantik u kuxtal maaya kaajo’ob te’el k’inako’obe’ tu péeksaj u yóol Raquel Araujo, máax jo’olbesik balts’am.
“Juntúul k’a’anan ko’olel máax yanchaj ti’ u muuk’il péeksik u kaajal Kinchil tu jo’oloj paalitsilta’al tu paalil. Tu ka’ansaj xook yéetel ts’íib ich maaya yéetel káastelan t’aan. Le beetike’, jach ok’om óol u tukulta’al kíinsa’ab tu kaajal ka’alikil 33 u ja’abil, tumen ku máan u péektsilt u páajtalil u yéet kaajalo’ob”, tu ya’alaj Araujo.
Meyaje’ yáax tukulta’al tu ja’abil 2016, ka’aj jáan chíikpaj Felipa beey juntúul personaje ichil jump’éel balts’am tu beetaj Raquel, tu k’aaba’taj, El siglo de las mujeres. Le meyaj je’elo’ tu péeksaj ti’al u beetik jump’éel guión tu múul meyajtaj yéetel xts’íib balts’am Ana Lucía Ramírez, xbeet balts’am Katenka Ángeles yéetel xts’íib Sasil Sánchez. Úuchik u beeta’al ts’íibe’ yanchaj u xak’alta’al jejeláas ba’alo’ob ti’ u kuxtal Felipa, ts’o’oke’ yanchaj tak tsikbal yéetel u láak’o’ob láayli’ kuxa’ane’.
En español: Teatro de la Rendija presenta obra que homenajea la vida de Felipa Poot Tzuc, activista maya
Beey túuno’, balts’ame’ ku táakbesik xan maaya t’aan, yéetel ts’íibo’ob meyajta’ab tumen Sasil Sánchez yéetel u paaxil Germán Romero. Le jats’uts ba’alo’oba’ ku múul yantalo’ob yéetel juumo’ob beeta’ab tumen David Puc, u escenografíail Óscar Urritia yéetel u nook’ilo’ob beeta’ab tumen Elena Martínez Bolio.
Le bix kaláanta’anil bix u chíikbesa’al balts’am yéetel xan u paaxile’, ku méek’ik u meyaj Katenka Ángeles, máax ku ye’esik u paalil Felipa, ba’ale’ beyxan tak u k’iinilo’ob úuchik u jach péek yóok’olal u kaajal.
Felipa, un relámpago en la oscuridad, yaan u béeytal u ts’ook cha’anta’al desde bejla’a’ jueves 27 tak domingo 30 ti’ noviembre. Láas 8 áak’ab tu kúuchil Teatro de La Rendija sede A, tu bejil 50 #464-D ichil 49 yéetel 51, K’íiwik. Balts’ame’ 50 minutos ku xáantal.
Xak'alutskíinsa'an tumen: Sasil Sánchez Chan
