Mexicoil baatsilo’obe’ u k’áato’ob u sats’ taak’in, le beyka’aj ku páajtale’, ti’al u k’iinilo’ob Navidad, kex tumen jelekbal kóonsumóo, ts’o’oke’ náajal taak’ine’ tu bin u p’íitchajal. U kóonsultorail meerkadóos Kantare’ ku tukultik kaaje’ yaan u bo’otik maanal 15 por siiento ti’al u manik siibalo’ob, keetel yéetel le beyka’aj xupa’ab le ja’ab máaniko’.
U ya’abtal maan ku beeta’al ti’al le 24 ti’ diciembrea’, nuupul yéetel u maas k’a’abéetkunsa’al xan u táarjetasil kreeditóo, tumen wíinike’ ku kaxtik bix u p’axik u maan, ti’al beyo’ u ch’a’anuktik próomosyoono’ob ku jóok’sa’al je’el bix El Buen Fin, Black Friday wa Cyber Monday, ti’al ma’ u p’áatal mina’an taak’in ti’ máak ti’al u ts’o’okbal ja’ab, tu ya’alaj.
U xaak’alil Navidad 2025: Lo que mueve al consumidor mexicano en Navidad, jts’a’ab k’ajóoltbil le miércoles máanika’ tumen u mola’ayil Kantar. Te’elo’ ku ya’alal u promeedyoil tojol ku ja’atsal ti’al u ma’anal siibalo’ob te’el ja’aba’ ku chukik 6 mil 359 pesos, le je’ela’ maanal 15 por siientoil ti’ le beyka’aj xupa’ab le ja’ab máaniko’.
Ichil ba’ax a’alab te’el ts’íibo’, u 65 por siientoil tojol ti’al u k’iinilo’ob Navidade’ yaan u k’a’abéetkunsa’al ti’al u ma’anal u siibal láak’alo’ob; 20 por siientoe’ ti’al u siibal áamigo’ob, yéetel u 15 por siientoile’ ti’al éet meyajo’ob.
t meyajo’ob. “Maas ma’ ya’ab siibalo’ob kun ts’áabili’, ba’ale’ wíinik maas ya’ab tojol ken u k’a’abéetkuns ti’al u maan. Ma’ mejen siibalo’obi’, maases ku ch’a’abal uláak’ taak’in ti’al u ma’anal uláak’ ba’al maas chan ma’alob”, tu ya’alaj ti’ k’a’aytajil tsikbal Paloma Sevy, máax jo’olbeisk kweentáas ich Kantar México.
Xaak’ale’ tu chíikbesaje’, u 31 por sientoil siibalo’obe’ yaan u bo’olchajal yéetel u táarjetail kreeditóo; 29 por sientoe’ ku ma’anal yéetel deebitóo; 26 por sientoe’ yéetel u taak’inil éefektibóo, yéetel u yalabilo’ de jejeláas yaanal bixij. Tu ja’abil 2024e’, u 35 por sientoil siibalo’obe’ jma’an yéetel u taak’inil éefektibóo; 28 por sientoile’ yéetel deebitóo, yéetel u 21 por sientoile’ yéetel u táarjetail kreeditóo.
Xak'alutskíinsa'an tumen: Sasil Sánchez Chan
