Jump’éel robot úumanoide chinoe’ táakbesa’ab ichil u áanalte’il Guinness, tu’ux ku ts’íibta’al réekords. Lela’ tumen tu béeykuns u xíimbaltik maanal 100 km ich óoxp’éel k’iin, u jach náachil tak tu’ux k’ucha’an jump’éel maakináa beetik ba’al beyo’.
AgiBot A2, u k’aaba’. Ku p’isik kex 169 sentimmertóos, ts’o’oke’ jóok’ ti’ u chinail kaaj Suzhou tu yáak’abil 10 ti’ noviembre. Tu xíimbaltaj noj bejo’ob yéetel uláak’ autopiistáas ti’al u mariitimóo kúuchil Bund, tu kaajil Shanghái, tu k’iinil 13 ti’ noviembre, je’el bix jets’a’ab tu áanalte’il Libro Guinness de los Récords.
U mola’ayil AgiBot, jeets’el tu noj kaajil Shanghái, tu tsolaj robot u beetmaje’ “tu xíimbaltaj jejeláas súuperfiisyees (...) ba’ale’ tu chíimpoltaj u noormasil traafikóo”, ka’alikil táan u xíimbaltik 106 mil 286 kiloometróos.
Mola’aye’ tu ts’áaj k’ajóoltbil cha’ano’ob tu’ux ku chíikpajal A2, de samal boox yéetel boox boonil, ka’alikil k’as talam xíimbal yóok’ol jump’éel bej, tu tséel máaxo’ob nat’ik bíisikleetáa yéetel eskuuteres, ma’ili’ u séebkuns u bin ti’al u k’ucul tak tu noj bejil Shanghái.
Ichil ba’ax a’alab tumen AgiBote’, ka’aj patjo’olta’ab u robotil A2e’, tukulta’ab yaan u beetik meyajo’ob je’el bix áatensyoon al klieentée, ts’o’oke’ ts’a’aban tak u nu’ukulil u k’amik chat. Beyxan ku béeytal u xokik u chi’ máak kéen t’aanak.
Nojoch mola’ayo’ob beetik téeknolosyase’, táan u ts’áako’ob ya’abach taak’in ti’al u meyajta’al íintelijeensia áartifisyaal fiisikáa, ts’o’oke’ ichil ba’ax a’alab tumen Morgan Stanleye’, ti’ yóok’ol kaabe’ je’el u yantal maanal mil miyoonesil robot úumanoideob ti’al u ja’abil 2050.
U jala’achil u noj lu’umil Chinae’ táan u jach péektsiltik mola’ayo’ob yaan te’elo’ ti’al u meyajta’al uláak’ úumanoideob, ts’o’okole’ tu winalil agostoe’, k’ama’ab u yáax robootikóo “báaxalo’ob” yóok’ol kaab tumen u noj kaajil Pekín, tu’ux táakpaj maanal 500 “atleetaob” tu ketubáajo’ob ti’ jejeláas ba’alo’ob je’ex báalonseestóo wa u beeta’al líimpiesáa.
Xak'alutskíinsa'an tumen: Sasil Sánchez Chan
