U mola’ayil Sedecultae’ tu k’ubáaj u yáxc chíimpolalil Premio de Poesía en Lengua Maya ''Isaac Carrillo Can''

U mola’ayil Secretaría de la Cultura ti’ u noj lu’umil Yucatáne’, tu k’ubaj tu kúuchil Gran Museo del Mundo Maya, u chíimpolalil Premio de Poesía en Lengua Maya “Isaac Carrillo Can”, úuchik xan u k’iimbesa’al u óoxlajun ja’abil meyaj le kúuchilo’, ba’ale’ beyxan ti’al u k’iimbesa’al Día de Nacional de la Cultura Maya.

Chíimpolale’ jk’u’ub ti’ yuum Isaac Carrillo y Ku, ts’o’oke’ ku táakmuk’tik u yóol U Jala’achil U Noj lu’umil Yucatán, ikil u k’ubéentmaj ti’ u mola’ayil Secretaría de la Cultura y las Artes (Sedeculta), ti’al ka mu’uk’ankúunsa’ak poliitikáa puublkáa ku kaxtik u ka’ líik’sik u muuk’ maaya t’aan, yéetel ti’al xan u péektsilta’al máaxo’ob ku ts’íib ichil le t’aana’.

Le beetik yéeya’ab u k’aaba’ aanimáas jts’íib Isaac Carrillo Can ti’al le chíimpolala’, tumen beyo’ ku tsikbe’ental noj meyaj tu beetaj tu kuxtal, tumen tu kan u jit’ k’ajla’ay, óol yéetel u kuxtalil wíinik sáansamal.

Beyxan ti’al u yéeya’al máax chíimpolta’ab yéetel Premioe’ jt’ana’ab máax chúuns u múuch’kabil Asociación de Escritores en Lenguas Indígenas de México, Briceida Cuevas Cob; x-éeditora, xk’aay tuujul yéetel áaktibiistáaa, Sasil Sánchez Chan; beyxan jxaak’al yéetel jka’ansaj Wildernain Villegas Carrillo, máaxo’ob xan jejeláas tu’ux chíimpolta’ano’ob.

Máax jo’olbesik Sedecultae’, Patricia Martín Briceño, tu k’a’ajsaj chíimpolale’ “yanchaj ti’al u yila’al maaya t’aane’ kuxa’an sáansamal, ma’ chéen u k’a’ajsajili’. T’aan ku tuukul, ku patjo’ol yéetel ku k’exik ba’al ichil máaxbo’ob t’anik”. 

Te’el súutuko’ Carrillo y Ku tu ts’áaj u níib óolalil tumen ku k’a’ajsa’al u paalil, tu’ux xan tu ya’alaj jayp’éel t’aano’ob u ti’al “Ktaasikech tak tuukul tumen ta k’ubaj a wóol ti’ maaya miatsil, beyxan ti’ ts’íib, ts’o’oke’ ta péeksaj ya’abach puksi’ik’alo’ob yéetel a tuukulo’ob”, tu ya’alaj.

Xak'alutskíinsa'an tumen: Sasil Sánchez Chan