Ichil jejeláas meyajo’ob beeta’ab ichil u cha’anil Óoxlajun, el 13 Aniversario del Gran Museo del Mundo Maya, táakbesa’ab u ye’esajil Christian Rasmussen: álbum fotográfico personal, tu’ux ku béeytal u yila’al u yoochel ba’axo’o suuk u beeta’al ich kaajo’ob, ba’axo’ob ku alab óolta’al, k’iimbesajo’ob yéetel uláak’ ba’axo’ob ku yila’al tu kaajilo’ob Yucatán.
Jch’a’a oochel Rasmussene’ ku chíikbesik oochelo’ob tu ch’a’aj tu ja’abil 1974 tak walkila’, ts’o’oke’ chíika’an ajxíinximbal máako’ob, je’elsaj meyaj, kaarnabalo’ob, u jkoonilo’ob lóoteriyáa, k’áat máatan taak’ino’ob, próostitutaob, máaxo’ob póokik saanto’ob, x-xiit’o’ob, ajchuk kayo’ob, ichil uláak’ wíinik suuk u yila’al ich kaaj.
Tu súutukil úuchik u ts’a’abal k’ajóoltbil e’esajile’, máax jo’olbesik u mola’ayil Secretaría de la Cultura y las Artes (Sedeculta), Patricia Martín Briceño, tu ch’a’achibtaj u k’a’ananil u áantropolojiikóo paakat Rasmussen tumen yéetel oochelo’ob tu ch’a’aje’ ku chíikbesik k’a’anan súutukilo’ob ti’ kuxtal yanchaj te’el k’inako’obe’, beyxan le ku yúuchulo’ob walkila’, ikil u ye’esik kaajo’ob tu’ux xan ku chíimpoltik maaya kaajo’ob ti’ u lu’umil Yucatán.
Tu tsikbaltaj xane’, múul meyaj yanchaj ichil jch’a’a oochel yéetel u núup, x-áantropoologáa Silvia Terán -máax xan jach chíimpolta’an yóok’olal meyaj u beetmaje’- ku chíibkesik xan bix u paakat máaxo’ob ku beetiko’ob áantropoloojikáa xaak’alo’ob te’el k’iino’oba’, tu lu’umil Yucatán yéetel México.
Beyxan te’el súutuk chúun e’esajile’, táakpaj xka’ansaj Silvia Terán, máax ku beetik xaak’alo’ob ichil u mola’ayil Sedeculta, je’el bix xan Fidencio Briceño Chel, máax jo’olbesik Museos y Patrimonio de la Sedeculta; Elisa Chavarrea Chim, máax jo’olbesik Patrimonio láayli’ ichil le mola’ayo’, yéetel Julián Dzul Nah, u díirektor teeknikoil Museo.
Xak'alutskíinsa'an tumen: Sasil Sánchez Chan
