Ti’al u chíimpolta’al u máan U K’iinil Máasewal Kaajo’obe’ káajsa’ab Máacewal Fest, jump’éel meyaj táan u beeta’al ti’ Internet ti’al u káajal u chikbesa’al túumben kuxtal táan u yantal u ch’a’akuntal tumen maaya kaaj. Tu yóok’lale’, ts’o’ok u yáax beeta’ab u tsikbalil Impacto social, productivo y cultural del COVID-19 en los pueblos mayas.
Máax jo’olbesik u beeta’al le meyaja’, Jesús Aguilar Beh, tu ya’alaj le meyaj táan u beeta’ala’ táan u kaxtik “u ye’esik yéetel u beetik u yantal kúuchilo’ob ti’ Internet ti’al u yila’al bix le túumben kuxtal ichil u maaya kaajilo’ob Meéxico, ba’ale’ beyxan ti’al u yantal tu’ux u múuch’ul máak ti’al t’aan, tuukul yéetel tsikbal. Beyo’, je’el u béeytal u tukulta’al yéetel u mu’uk’ankúunsa’al ba’ax táan u beeta’al ti’al u táakmuk’ta’al yéetel ti’al u k’i’itbesa’al le jejeláas ba’al táan u beeta’al ti’ kaambal, its’at, miatsil yéetel meyaj ku beeta’al ich kaajo’ob.
Walkila’ táan u beeta’al tsikbalo’ob yéetel yaan u ts’o’okol tak tu k’iinil 9 ti’ agosto. Ka’alikile’, bejla’a 7 ti’ agostoe’ yaan u beeta’al jump’éel tsikbal ku k’aaba’tik ¿Cuál es el futuro de los jóvenes mayas en tiempos de pandemia?, tu’ux yaan u táakpajal Adriana Uex, Ismael Briceño, Maritza Yeh yéetel Edber Dzids. Beyxan tu jach k‘iinil 9e’ yaan u yantal yéetel paax tu’ux yaan u táakpajal La luna, la espuma y el zorzal, Grupo Airi ichil uláak’o’ob.
