K'iintsil
Efe
07/01/2026 | Buenos Aires, Argentina
Le martes máanika’ yanchaj u jóok’sa’al máak tu kaajalo’ob, úuchik u jóopol k’áak’ ti’ k’áaxo’ob naats’ yanik tu baantail Patagonia, tu noj lu’umil Argentina, tu noojolil le noj lu’umo’. Ts’o’oke’ tak walkila’ ts’o’ok u k’aschajal ya’abach ektaareaob k’áax tu’ux ku beeta’al kooli’.
Ichil ba’ax a’alab tumen u mola’ayil Agencia Federal de Emergencias, láayli’ joopol óoxp’éel tu’ux tu baaintail u kaajilo’ob Chubut yéetel Santa Cruz, ka’alikil uláak’ ukp’éele’ béeychaj u tu’upul wa u júubul ti’ u ts’ook oorailo’ob, tu baanta patagoniail Argentina.
Beyxan u mola’ayil Servicio Meteorológico Nacional (SMN) tu k’a’aytaj le martes máanika’ yaan u jach sajbe’entsil u k’áak’tal láayli’ te’el kaajo’obo’ ti’al le k’iino’ob ku taalo’oba’.
K’as talam u tu’upul k’áak’ tumen jach laj tikin ba’al, ts’o’oke’ ma’ xan táan u k’áaxal cháaki’, yéetel mantats’ yaan iik’, le beetike’ séeb u jóopol k’áak’ ma’ táan u béeytal u séeb tu’upul.
Tu kaajil Chubute’, jóop k’áak’ tu chúmuukil k’iin le lunes máanika’ tu baantail Puerto Patriada, kúuchil suuk u xíimbalta’al ts’o’oke’ eel najo’ob yéetel jejeláas koocheob, beyxan yanchaj u jóok’sa’al ya’abach máako’ob yéetel kajnáalo’ob ti’ yano’ob ka’ach te’elo’.
U íintendenteil El Hoyoe’, César Salamíne’, tu ya’alaj yanchaj ya’abach kajnáalo’ob jóok’sa’ab yéetel u yáantajil koocheob ti’ u ts’ook oorailo’ob, yéetel ma’ yanchaj mixmáak úuch loob ti’.
53 bríigadistailo’ob ti’ u mola’ayil Servicio Provincial de Manejo del Fuego de Chubut, Gendarmería, Bomberos Voluntarios (ti’ u kaajilo’ob Lago Puelo, El Bolsón, El Hoyo, Trevelin) yéetel Policía Provincial táan u meyajo’ob te’elo’. Beyxan k’a’abéetkunsa’ab kamp’éel péepen k’áak’o’ob láalik ja’ ti’al ka béeyak u tu’upul k’áak’.
Xak'alutskíinsa'an tumen: Sasil Sánchez Chan
