K'iintsil
Ap
14/01/2026 | Ciudad de México
U múuch’ k’aayil K-pop BTS tu ts’áaj k’ajóoltbile’ yaan u beetik xíimbal meyaj tu ja’abil 2026-2027, tu’ux yaan u máan k’aay maanal 70 u téenal tu noj lu’umilo’ob Asia, Norteamérica, Sudamérica, Australia yéetel Europa.
Yáax k’aaye’ yaan u beetiko’ob Corea del Sur ti’al u winalil abril, yéetel yaan u taal u ts’o’okol tu winalil marzo ti’ u ja’abil 2027.
Ti’al máaxo’ob táaka’an ich ARMYe’, yaan u béeytal u ma’anal prebeentáa tu k’iinilo’ob 22 yéetel 23 ti’ enero. Ba’ale’ ti’al u yokol máak te’el múuch’ je’elo’, k’a’abéet u yáax okol máak u rejistrartubáaj tu kúuchil Weverse méek’a’an tumen HYBE.
Tu k’iinil 24 ti’ enero kéen káajak u ko’onol boleetóos ti’al je’el máaxake’.
Múuch’e’ yaan u kóokol k’aay xan Ciudad de México; ti’ kun úuchul estaadyo GNP Seguros, tu k’iinilo’ob 7, 9 yéetel 10 ti’ mayo, ti’ le ja’abil 2026a’.
K’a’aytajile’ beeta’ab tu jo’oloj jayp’éel k’iino’ob a’alak tumen u mola’ayil BigHit Musice’, u múuch’ k’aayil BTSe’ yaan u ch’a’ajoltik paax tu k’iinil 20 ti’ marzo, tu jo’oloj kex kamp’éel ja’abo’ob je’elek.
Yanchaj u ch’éenel u k’aayo’obe’, tumen le uktúul xi’ipalalo’ob táakano’ob BTSe’ RM, Jin, Jimin, V, Suga, Jung Kook yéetel j-hope) yanchaj u beetik u séerbisyóo militaar najmal u beeta’al Corea del Sur.
Beey túuno’, ichhil kaajo’ob tu’ux yaan u máano’ob k’aaye ti’ le ja’abil 2026 yaniko’ona’ ti’ yaan: Tokio; Tampa, Florida; El Paso, Texas; Stanford, California; Las Vegas; Busan, Corea del Sur; Madrid; Bruselas; Londres; Múnich; París; East Rutherford, Nueva Jersey; Foxborough, Massachusetts; Baltimore; Arlington, Texas; Toronto; Chicago; Los Ángeles; Bogotá, Colombia; Lima, Perú; Santiago, Chile; Buenos Aires, Argentina; Sao Paulo.
Yéetel ti’al u ja’abil 2027, leti’ lelo’oba’: Melbourne, Australia; Sídney; Hong Kong yéetel Manila, Filipinas.
Xak'alutskíinsa'an tumen: Sasil Sánchez Chan
