Uléejisladoorilo’ob Franciae’ tu éejento’ob le martes máanika’, jump’éel u proyeektoil a’alamjt’aan tu’ux ku je’ets’el paalal ma’ u chuk 15 u ja’abile’, ma’ táan u páajtal u k’a’abéetkunsik reedes sosyaales. U tuukulil, wa ka béeyake’, ka káajak u chíimpolta’al ti’al u túumben ja’abil xook kun káajal septiembre, je’el bix u bin u je’ets’el xan u jach p’íitil ja’ab kun éejentbil ka béeyak u meyaj pláatafoormaob ti’ paalal ichil tuláakal Europa.
U proyeektoil a’almajt’aane’, ma’ táan u cha’ik xan u k’a’abéetkunsa’al séelularo’ob ti’ najilo’ob xook de séekundaaryae’, éejenta’ab ti’ yéeytambal jp’áat 130-21 tu yáak’abil le lunes máanika’. U jala’achil u noj lu’umil Francia, Emmanuel Macrone’, ts’o’ok u k’áatik ti’ léejilslayoone’ ka u séebkunsej, le beetik walkila’ nuka’aj tsikbaltbil Senado ti’ le semana kun taalo’oba’.
En español: Francia: legisladores aprueban la ley que prohíbe las redes sociales a menores de 15 años
U p’áatal ma’ táan u cha’abal reedes sosyaales ti’ paalal ma’ u chuk 15 u ja’abile’, jump’éel ba’ax ku tsolnu’ukta’al tumen ajxaak’al máako’ob, ts’o’okole’ leti’ xan ku k’áata’al tumen franciail kaaj”, tu ya’alaj Macron ka’aj ts’o’ok u yéeytambal. “Tumen u ts’o’omel u pool kpaalalo’obe’ ma’ de konbilo’obi’, mix ti’al u pláataformaasil Estados Unidosi’, mix xan ti’al chinail reedes. U náayo’obe’ ma’ unaj u bejbesa’al tumen áalgoritmo’obi’”.
A’almajt’aane’ tukulta’ab ti’al u chíimpolta’al xan Ley de Servicios Digitales beeta’an tumen Unión Europea, tu’ux ku je’ets’el jun jaats ba’alo’ob ti’al u kaláanta’al máaxo’ob k’a’abéetkunsik Internet. Tu winalil noviembree’, europeoil léejisladoro’obe’ tu k’áato’ob ka beeta’ak wa ba’ax tumen UE ti’al u kaláanta’al paalal ma’ u chuk 15 u ja’abil, ti’al u tse’elelo’ob ti’ ba’axo’ob k’askúuntik u tuukulo’obi’.
Xak'alutskíinsa'an tumen: Sasil Sánchez Chan
