Chak ik’al Gezani tu biinsaj najo’ob ti’ noj kaaj yaan u k’áak’náabil tu noj lu’umil Madagascar, ts’o’oke’ tu kíinsaj kex 31 máak ka’alikil táan ka’ach u k’áatksiko’ob peten yaan ichil Índico k’áak’náab. K’a’am u yu’ubal u yiik’al yéetel u cháakil, beey úuchik u ya’alik jo’olpóopo’ob le miércoles máanika’.
U séerbisyoiil méetereolojikóo ti’ u kaajil Madagascar tu k’a’aytaj chak sajbe’entsil ti’al jayp’éel kaajo’ob, tumen tu ya’alaje’ je’el u búululo’obe’ yéetel je’el u níikil ba’al je’el bix u bin u k’áaxal le k’a’amkach cháako’. Káaj u yu’uba’al tu ts’ook súutukil le martes máanika’, yéetel u yiik’ale’ maanal 195 kms/h u jaats’. U’uya’ab u ts’íikil le iik’o’ tumen kex 31 miyoonesil kajnáalo’ob te’el peteno’, u ya’abil ti’ leti’obe’ ich óotsilil kuxa’ano’ob yéetel ma’ jach no’oja’an yanik refuujio’ob ti’al u máansiko’ob le k’a’amkach cháako’.
En español: Ciclón tropical 'Gezani' deja 31 muertos en Madagascar y destruye casas
Madagascare’ tu yu’ubaj u jaats’ uláak’ chak ik’al kex ka’ap’éel semaana pachil; jump’éel lu’um séeb u ja’ats’al tumen iik’o’ob ku yantalo’ob tu ja’il Índico.
U kúuchil Oficina Nacional de Gestión de Riesgos y Desastres tu ya’alaje’, tumen níik ka’anal najo’obe’ leti’ úuchik u kíimil kex 31 máako’ob, yéetel yanchaj kex 36 wíinik úuch loob ti’ob ka’aj jaats’naj Gezani tu kaajil Toamasina. Oficinae’ tu ya’alaj kantúul máako’ob ma’ ojéela’an tu’ux ts’o’oko’obi’ yéetel maanal 6 mil wíinik yanchaj u jóok’sa’al ti’ u yotoch.
Tu kaajil Toamasinae’ yaan kex 300 mil kajnáalo’ob, ts’o’oke’ ya’ab loob úuch te’elo’. U ya’abil máaxo’ob jkíime’ ti’ le kaaj je’el yano’obo’, tu ya’alaj jo’olpóopo’ob.
U jala’achil noj lu’ume’, Michael Randrianirina, tu xíimbaltaj u kaajil Toamasina ti’al u jach ilik bix yanik ba’al te’elo’, yéetel ti’al u much’kubáaj yéetel kajnáalo’ob.
Xak'alutskíinsa'an tumen: Sasil Sánchez Chan
