K'iintsil
Afp
19/02/2026 | Tesero, Italia
Jats’uts yéetel taj che’ejbil ba’ax úuch ichil u keetilo’ob Juegos Olímpicos de Invierno de Milán-Cortina: juntúul peek’e’ béeychaj u k’atik tuláakal ba’ax ts’a’aban ti’al ma’ u béeytal u máan máak te’el tu’ux ku beeta’al keetilo’obe’, ka’aj tu kaxtaj bej ti’al u k’uchul tak tu piistail tu’ux táan u yáalkabta’al u keetil esprint esquí de fondo ich múuch’o’ob. Lela’ úuch le miércoles máanika’, tu kaajil Tesero.
Peek’e’, de husky u raasail. Áalkabil úuchik u yokol te’el piistao’, tu paach ka’atúul kóompetidoraob, xgriegail Konstantina Charalampidou yéetel xcroaciail Tena Hadzic. Ma’ili’ u k’ato’ob le metao’, je’el bix uláak’ juntúul déeportistae’, chíikpaj le peek’ áalkabnajo’.
“Jats’uts le chan peek’o’, ma’ ts’íiki’, le beetik ma’ yanchaj mix jump’éel talami’”, tu ya’alaj Charalampidou.
”Ka’aj ts’o’ok u k’atik metae’, tu nats’ubáaj tu’ux uláak’ máako’ob. Tene’ taak in jáaxtik ka’achij, ba’ale’ ma’ béeychajij, sa’at teen”, tu ya’alaj x-eskiadorail griega.
“Ma’ jach ma’alob úuchik u wáalka’abtik le keetilo’, ma’ ki’imak in wóol yéetel ba’ax tin beetaji’, ba’ale’ ts’o’ok in k’ajóolta’al yóok’olal juntúul peek’, walkila’ tuláakal máak u k’áat u k’áatchi’ibten. Yáax juntéen in beetik”, tu ya’alaj.
Peek’e’ púuts’ ti’ juntúul máak táan ka’ach u máansik naats’ te’elo’, a’alab tumen u jo’olpóopilo’ob kaaj.
Edición: Emilio Gómez
