W alkil 95 miyoonesil ja’abo’obe’, jaytúul nukuch díinosauyo’obe’ ku máabo’ob xíinximbal tu k’áaxil argentinail Patagonia, ichilo’obe’ le jak’be’en janal bak’ Giganotosaurus, ku aaltal ka’ach tak waxakp’éel tóoneladaob, yéetel xan nuxi’ chowak kaal janal xíiw Argentinosaurus, ku aaltal tak 70 tóoneladaob.
Ba’ale’ le je’elo’, ma’ chéen u lu’umil nukuch ba’alche’obi’, je’el bix u yila’al ti’ foosilo’obi’. Ajxak’al máako’obe’, tu kaxto’ob u óoli’ chuka’an yéetel ts’aka’an baakel juntúul ti’ le díinosauriob maas jach chichan ojéelta’ab yanchaj ti’ yóok’ol kaab, k’aaba’inta’ab Alnashetri cerropoliciensis.
U nojochile’ je’ex ti’al juntúul kuerbóo, yéetel míin ku máan u chuk mejen ba’alche’ob je’el bix áayimo’ob, kaan yéetel uláak’ ba’alche’ob.
En español: Científicos argentinos descubren nueva especie de dinosaurio gigante en la Patagonia
Ka’aj kaxta’ab foosile’, u baakele’ je’el bix ka’aj kuxlaj yaniki’, ts’o’oke’ lelo’ ku ts’áak u páajtalil u yojéelta’al uláak’ ba’alo’ob yóok’olal alvarezsaurios, jump’éel u baatsil díinosauriob ma’ jach suuk u yila’ali’, ti’ junmúuch’ k’aaba’inta’an terópodos, tu’ux táaka’an tak díinosauriob jaantik bak’.
Le jejeláasila’, pata’ab u k’aaba’ beey “Alna”, yéetel ti’ jpáana’ab tu áareniskail jump’éel yáasimiento ku k’aaba’tik La Buitrera, tu chan kaajil Río Negro, tu xamanil Patagonia, tu’ux kaxta’an uláak’ ya’abach foosilo’ob mejen ba’alche’ob ti’ u jats k’iinilo’ob Cretácico.
Alnae’ juntúul chichan xch’upul ba’alche’ kaja’an tu’ux yaan tikil lu’um, yéetel jkíim ka tu chukaj kamp’éel u ja’abil, le beetik óoli’ chúuka’an úuchik u xuulchajal. Ka’aj kíime’, u wíinkilal Alnae’ jmu’uk tumen jump’éel u wiitsil áarena, le beetik jach ma’alob ts’aka’an úuchik u p’áatal.
Xak'alutskíinsa'an tumen: Sasil Sánchez Chan
