U jala’achil u lu’umil Rusia, Vladimir Putín, tu ts’áaj k’ajóoltbil le martes máanika’, béeychaj u yáax k’uchulo’ob tu xuul jump’éel noj áalkab táan u beeta’al ti’al u yila’al máax ku yáax ts’o’oksik u kanants’áakil tu táan COVID-19, tumen le k’oja’ana’ ts’o’ok u jach beetik u k’éexel ba’al ti’ tuláakal yóok’ol kaab.

U mola’ayil Organización Mundial de la Salud (OMS) ma’ tu jach ki’iki’ óoltik tumen rusoil ts’aake’ mix ch’a’achibta’ab ka’ach ichil le yáax wáakp’éel tu ya’alaj táan u ch’a’ak bej ti’al u ts’o’oksalo’obi’, ts’o’okole’ unaj xan u jach xak’alta’al tu beel ti’al u yila’al beyka’aj u yutsil, le beetike’, tu páayt’antaj máak ti’al u ya’alale’, meyaj ts’o’ok u beeta’ale’ chéen beey preclasificación, ts’o’okole’ tu k’a’ajsaje’, ti’al u páajtal u je’ets’el tu beel jump’éel báakunae’ unaj u yáax máan “ti’ nojoch xaak’alo’ob”.

U k’a’aytal u ts’o’oksal le kanants’aaka’ jbeeta’ab tu jo’oloj u k’áata’al jump’éel ju’un tumen Asociación de Organizaciones de Ensayos Clínicos -tu’ux ku mu’uch’ul tu lu’umil Rusia le 25 u p’éel asab k’a’anantak láaboratoryo’ob yaan yóok’ol kaab-, tu’ux ku ya’alal ti’ u ministroil Sanidad, MIjail Murashko, ma’ unaj u séebkunsik ba’ali’ ts’o’okole’ tu ch’a’achibtaj ba’axo’ob sajbe’entsil je’el u yantale’, tumen ma’ táan u páajtal u yojéelta’al ba’ax je’el u yúuchule’, le beetik k’a’abéet u jach xak’alta’al tu beel bix u bin tu wíinkilal máak tak le ken páatak u je’ets’el no’ojan p’áatik yéetel ma’ xan sajbe’entsil ti’ máak, mix yóok’lal ba’ax k’oja’an yaan ti’ máak ken ts’a’abak ti’, mix xan yóok’lal jayp’éel u ja’abil.

Edición: Ana Ordaz