Kex jo’otúul máak jkíim, juntúul ti’ leti’obe’ u xmeyajil Petróleos Mexicanos (Pemex), úuchik u jóopol k’áak’ ti’ jump’éel réefineria Olmeca p’aatal tu méek’tankaajil Paraíso, Tabasco, beey úuchik u ts’a’abal k’ajóoltbil tumen le mola’ayo’.
Pemex tu ya’alaje’, kex las 6 ja’atskab k’iine’, ila’ab jóop k’áak’ tu paach jump’éel pak’ bak’pachtik u predioil 1, tu’ux ku líik’sa’al íidrokarburo’ob ti’ u réefineriail Dos Bocas, je’el bix k’ajóolta’anilo’.
“Yóok’lal le k’a’amkach cháako’ob yanchaje’, tuulnaj ch’ach’al ja’ tu táankabil réefineria Olmeca, ts’o’oke’ áak le jao’, ka’aj múuch’ ba’axo’ob beetik u jóopol k’áak’ yóok’olal le ba’ax wéek tu paach le pak’o’”, tu tsolaj mola’ay yóok’olal bix úuchik u yantal le k’áak’o’.
Tu ya’alaje’, yóok’olal le je’elo’, sa’at u kuxtal jo’otúul wíinik. Ichilo’obe’ juntúul u xmeyajil Pemex.
Ka’aj tu’up le k’áak’o’, mola’aye’ tu ya’alaj le kúuchil tu’ux ku líik’sa’al íidrokarburo’obe’, mixba’al úuch ti’, ts’o’oke’ ku béeytal u meyaj je’ex suukile’.
Tu jo’oloj túun láaj tu’upuk k’áak’e’, Pemexe’ tu ya’alaj máaxo’ob ku meyaj Salvaguardia Estratégica ichil le mola’ayo’, táan u múul meyajo’ob yéetel jo’olpóopo’ob ti’al u je’ets’el ba’ax beet u t’áabal le k’áak’o’.
Pemex túune’ tu k’a’aytaj u yaj óolal yóok’olal le ba’ax úucho’, beyxan yóok’ol le máaxo’ob sa’at u kuxtal. Tu ya’alaje’ yaan u yáantik yéetel u láak’intik máaxo’ob úuch loob, ka’alikil u múul meyajo’ob yéetel mola’ayo’ob k’a’abéet ti’al u yutsil yantalo’ob.
Xak'alutskíinsa'an tumen: Sasil Sánchez Chan
