Ts’aak poochil: ti’ lajump’éel pedidos ku beeta’ale’, jump’éele’ ti’al u k’áata’al taakos

Tu noj lu’umil México, takoe’ noj chíikulal ti’ ba’ax suuk u juunta’al tumen kaaj, ts’o’oke’ ku nu’uktal ti’al u k’áata’al xan ti’ díijital nu’ukulo’ob.

Ichil daatos jóok’sa’ab tumen DiDi Foode’, tu ja’abil 2025e’, ti’ lajump’éel pediidos ku beeta’al te’el pláataformao’, jump’éele’ ti’al u k’áata’al taakos. Le je’elo’ jump’éel sáasil chíikulal e’esik maas ya’ab wíinik ku k’áatik taakos ti’al ma’ u yantal u bin u jaant tak tu kúuchil.

Uláak’ ba’ax a’alabe’, tu ja’abil 2025e’ k’áata’ab óoli’ 13 miyoonesil u pedidosil taakos ichil tuláakal u lu’umil México.

Ti’ le beyka’ajo’, k’áata’ab de páastori’, báarbakoa, dorados, bistek yéetel k’áatbil bak’. DiDi Food tu ya’alaje’, ichil le kaajo’ob tu’ux maas ya’ab k’áata’abe’ ti’ yanchaj Ciudad de México, Guadalajara, Monterrey, Mexicali, Puebla, Tijuana, Tuxtla Gutiérrez, Morelia, Cuernavaca yéetel Toluca.

Beyxan, chíika’an ba’ax ooras maas ya’ab u k’áata’al. Ti’al domingose’, u ya’abile’ ku k’áata’al ichil láas 9 yéetel las 10 áak’ab. Beey túuno’, u k’iinil 17 ti’ agosto leti’e’ k’iin maas jach ya’abchaj u k’áata’al taakos ichil tuláakal u ja’abil 2025.

Maas jach chíikpaj ya’abchaj u k’áata’al taakos tu ichil la 1 tak las 3 u taal u sáastal, tumen ka’anchaj 20% keetel yéetel le ja’ab máaniko’, úuchik u yantal maanal 170 mil oordenes te’el súutuk je’elo’.

Beey úuchik ti’ noj kaajo’ob je’el bix Ciudad de México, Monterrey, Mexicali, Guadalajara, Tijuana, Ciudad Juárez, Ensenada, Puebla, Los Cabos yéetel Tuxtla Gutiérrez, ti’ túun ku chíikpajal k’éex bix u ma’anal taakos ti’al jaantbil.

Taakoe’ ma’ chéen ti’al jaantbil wa ti’al ceenartbil, ti’al xak u luk’sik u poochil máak kéen ts’o’okok jump’éel k’iimbesaj wa tu jo’oloj ts’0’okok u yoorail meyaj.