Colombiae’ leti’e’ yáax noj lu’umil ti’ tuláakal América Latina tu’ux ts’o’ok u je’ets’el ma’ táan u páajtal mix táan u cha’abal u túunta’al kosmeetiko’ob ti’ ba’alche’ob. Le je’ela’ je’ets’ ti’ jump’éel a’almaj t’aan, ts’o’okole’ wa ma’ táan u chíimpolta’ale’ ku ts’a’abal u si’ipil máak tumen jala’ach Iván Duque, beyxan, te’e a’almaj t’aano’, ku je’ets’el ma’ táan u páajtal mix u yoksa’al konbil te’e lu’umo’ uláak’ nu’ukulo’ob je’el bix le je’elo’obo’.
Yéetel ba’ax je’ets’e’, u noj lu’umil Colombiae’ ku múuch’ul yéetel le uláak’ ka’ak’áal noj lu’umo’ob, tu’ux táaka’an Reino Unido, Nueva Zelanda yéetel Israel, tu’ux xu’ulsab u k’a’abéetkunsa’al ba’alche’ob ti’al u túunta’al kosmeetiko’ob.
“Jala’ach Iván Duque tu jets’aj u a’almaj t’aanil 2047 tu k’iinil 10 ti’ agosto ti’ u ja’abil 2020, tu’ux ku je’ets’el ma’ táan u páajtal u túunta’al, u yoksa’al konbil, u beeta’al mix u ko’onol kosmeetiko’ob túunta’an yéetel ba’alche’ob”, beey úuchik u k’a’aytal tumen u kúuchil Presidencia.
