K'iintsil
Ap
13/04/2026 | Houston, EU
Oochelo’ob mix juntéen yáax ila’ak tu tséelik Uj mixmáak ilik, ts’o’okij. U chi’ibil k’iin jats’utskíinsik Uj, ts’o’okij. Reekord yóok’olal beyka’aj náach k’ucha’an wíinike’, ts’o’okij.
Tumen uts úuchik u suut NASA tak te’el Ujo’ yóok’olal u meyajil Artemis IIe’, yóok’ol kaabe’ táak u k’áatik walkila’: ba’ax ku taal u k’iin beora’, bix u píitmáansa’al le ba’ax ts’o’ok u béeykunsa’alo’.
“Ti’al u máakilo’ob yóok’ol kaab táan u paakato’ob ka’an yéetel ku náaytiko’ob ya’abach ba’al je’el u béeytale’, ts’o’oka’an u yúuchul páa’tajil”; tu ya’alaj le sábado máanika’, máax beetik u áadministradoril NASA, Jared Isaacman, úuchik u presentartik u kóomandanteil Artemis II, Reid Wiseman, beyxan jpilotóo Victor Glover, Christina Koch yéetel jcanadail Jeremy Hansen úuchik u jach k’iimbesa’al u suuto’ob te’el Yóok’ol Kaaba’.
Walkila’, le wíiniko’oba’, máaxo’ob jk’uch Uj tu jo’oloj maanal 50 ja’abo’ob yáax k’uchuk máake’, kóojo’ob tuka’atéen Houston yiknal u láak’o’ob. Beey túuno’, NASAe’ táan u yichtik ba’ax ku taal u k’iinil yéetel Artemims III.
“U jeel meyaj ku taale’, ma’ náach yaniki’”, tu ya’alaj Rick Henfling, máax jo’olbesik bueelos de entraadáa, tu jo’oloj k’uchuk Pacífico tríipulasyoon le viernes máaniko’.
Walkila’ yaan túun uláak’ meyaj ts’o’ok u je’ets’el ti’ káalendaaryóo ti’al le ja’ab ku taalo’, tu’ux u áastronautailo’ob Artemis III -kex ma’ a’alaka máaxo’obe’- yaan u meyajo’ob yóok’ol bix u núupul u kaapsulail Orion yéetel jump’éel wa ka’ap’éel moodulos ku jáayal uj ti’ u oorbitail tu bak’pachil Yóok’ol Kaab. SpaceX, mola’ay ti’alinta’an tumen Elon Musk, yéetel Blue Origin, ti’al Jeff Bezos, táan u ketikubáajo’ob ti’al u yáax ts’o’oksiko’ob moodulo’ob ku jáayal uj.
Edición: Ana Ordaz
