Comisión Reguladora de Telecomunicaciones (CRT) tu ts’áaj k’ajóoltbil ich Diario Oficial de la Federación (DOF) mokt’aan jéets’ ti’al u jelbesa’al bix u k’a’abéetkunsa’al frekuensyáas, tu’ux jóok’sa’ab junjaats ichil u espeektroil ráadioelektrikoe’, ich amplitud modulada (AM), beyxan frecuencia modulada (FM) ti’al u k’a’abéetkunsa’al tumen kaaj, máasewalo’ob yéetel áafromejikaano’ob.
“Comisione’ yaan u yantal u jóok’sik u éestasyoonesil radio FM ti’al kaaj, máasewalo’ob yéetel áafromejikaano’ob; u 10% baandáa ti’al ráadiodíifusyonn FM, ich 88 tak 108 MHz”, beey a’alab ich “Acuerdo tu’ux je’ets’ tumen u Plenoil CRT ku éejentik u k’e’exxel u Programail ku meyaj bul ja’ab ti’al u k’a’abéetkunsa’al u baandasil frekuensyáa ti’ u ja’abil 2026”. Beey túuno’, mokt’aane’ ku jets’ik yaan u béeytal u ts’a’abal u páajtalil u yantal u raadyoil AM ti’al kaaj, máasewalo’ob yéetel áafromejikaano’ob. tu muuk’il ichil 1605 tak 1705 KHz.
Ichil k’eexilo’ob ku beeta’al ti’ u Programail 2026e’, táaka’an ka yanak jo’op’éel frekuuensayaob ich AM: jump’éele’ ti’al uuso puublikóo, yéetel kamp’éele’ ti’al u k’a’abéetkunsa’al tumen kaaj, le je’ela’ jóok’ tumen xak’alta’ab ju’uno’ob oksa’an ti’al u k’áata’al ka yanak éestasyoono’ob tu baandail 535 kHz tak 1705 kHz.
Yóok’olal FMe’, táakbesa’ab 27 frekuensyas: 11 ti’al u k’a’abéetkunsa’al de kóomersyaal, 11 ti’al uso puublikóo yéetel jo’op’éel ti’al kaaj, ich u baandail 88 MHz tak 108 MHz. Yóok’olal téelbisyoon díijital terrestree’, táakbesa’ab 50 kanalo’ob: óoxp’éele’ de kóomersyaal, 36e’ uso puublikóo yéetel 11 ti’al kaaj.
Xak'alutskíinsa'an tumen: Sasil Sánchez Chan
