U mola’ayil Organización Mundial de la Salud tu jets’aj le domingo máanika’ ka’ tóop’ u k’oja’anil ébola tu lu’umil República Democrática del Congo yéetel le yaan tu tséelo’, Uganda. Noj sajbe’entsil ti’al u toj óolal wíinik ichil tuláakal yóok’ol kaab, tu jo’oloj ojéelta’ak ts’o’ok u tsa’ayal kex ti’ maanal 300 máak yéetel tumen ts’o’ok u kíimil kex 88 u túulal.
OMSe’ tu ya’alaj le bix ts’o’ok u tóop’ol k’oja’anile’ ma’ tu k’a’abéetkunsik ka jach je’ets’en pak’be’en k’oja’an je’el bix ka’aj úuch yéetel COVID-19i’, yéetel tu ya’alaje’ ma’ tsaj u k’a’alal kaajo’obi’. Mola’aye’ tu ya’alaj tu kúuchil Xe’, ojéelta’ab xan yanchaj jump’éel kaasóo tu congoil noj kaaj Kinshasa, kex mil kms náach ti’ Ituri, kaaj tu’ux tóop’ le k’oja’anilo’, le beetik táan u yila’al je’el u séeb k’i’itpajale’. Tu ya’alaj le máax k’oja’anchajo’, tu xíimbaltaj Ituri, ts’o’oke’ míin yaan uláak’ máaxo’ob tsaayal ti’ob tu kaajil Kivu del Norte, jump’éel ti’ le kaajo’ob tu’ux maas ya’ab kajnáalo’ob yaan Congo yéetel tu xuul kaajil Ituri.
Beyxan u jala’achil u rebeeldeil kaaj Goma, le maas jach nojoch yaan tu lak’inil Congoe’, tu k’a’aytaj le domingo máanika’, jéets’ yanchaj le yáax máax ti’ jtsa’ay ébola’ te’el kaajo’. Máax k’oja’anchake’ luk’ tu kaajil Ituri, yéetel walkila’ ts’o’ok u jumpáaykunsa’al.
U k’oja’anil ébolae’ jach táaj séeb u pa’ak’al, ts’o’oke’ ku tsa’ayal yéetel ba’alo’ob je’el bix xej, k’i’ik’el wa seemen. Jela’an le k’oja’anil, ba’ale’ talam u ts’a’akal yéetel ya’abach juntéenake’ ku kíinsik máak.
U tuukulil ka’aj je’ets’ sajbe’entsil tumen OMS yóok’olal le k’oja’anila’, leti’ u yila’al bix je’el u béeytal u yáantal noj lu’umo’ob ti’al u je’ets’el k’a’anan ba’alo’ob u ti’al. Sajbe’entsil k’a’ayta’abe’ ku ya’alik noj ba’al le ku yúuchulo’, yéetel sajbe’entsil u pa’ak’al ti’ uláak’ kaajo’ob.
Xak'alutskíinsa'an tumen: Sasil Sánchez Chan
