U ka’a kuxkíinsa’al skate parke’ ku ye’esik u jaajil kuxtal chetumalil táankelemo’ob

Rescate de Skate Park muestra la realidad de la juventud chetumaleña
Foto: Cortesía Colectivo Backside

Ti’al ya’abach máako’obe’ jach talam ba’ax le ku jach k’áata’al ti’ máak “p’áatkech ta wotoch”, tumen wa ka k’uchuk u beeto’ob je’ex u ya’alalo’, je’el u yantal ya’abach talamilo’ob tumen ma’ táan u náajalo’ob ts’o’okole’ jach je’el u jach chi’ichnaktalo’obe’. Ba’ale’ yaan xan uláak’ máako’obe’, u ya’abile’ táankelemo’ob yéetel paalale’, u p’áatalo’ob tu yotocho’obe’ óoli’ jach je’el u beetik u naak’ ti’ob wa ma’ uts u biinsikubáajo’ob yéetel u láak’o’ob; leti’obe’ ma’ u k’áato’ob yantal tu yotocho’obi’, le beetik kex sajbe’entsile’ ku jóok’olo’ob, beey tu ya’alaj Rubén Martínez Carrillo, ti’ u múuch’kabil Backside, máaxo’ob líik’s tuka’atéen jump’éel chan paarkée ti’al u páajtal u beeta’al skate. Junmúuch’ táankelem paalal ti’ Backside, ts’o’okili’ u yáax meyajtiko’ob uláak’ bejo’ob yéetel kúuuchilo’ob je’el bix Callejón del Arte wa Zoológico de Chetumal. 

Leti’obe’ káaj u meyajo’ob jayp’éel p’iis k’iinilo’ob paachil tu múuch’ kajtalil Américas 1, tumen je’el bix uláak’ kúcuhilo’ob yaan tu kaajil Othón P. Blanco chéen beey p’ata’ano’ob yéetel mix ba’al u yutsil ti’ kaaj.

Martínez Carrillo tu k’a’ajsaje’, ka’aj k’ucho’ob te’elo’, táan ka’ach u kaxtiko’ob jump’éel kúuchil ti’al u páajtal u yantalo’ob ka’alikil u máan u k’iinil pak’be’en k’oja’an, le beetike’, je’el bix ti’ le kúuchila’, yanchaj uláak’o’ob tu’ux káaj u much’ikubáaj táankelemo’ob ti’al u beetiko’ob skate; jujump’íitil úuchik u jáajal u náats’al uláak’ máako’ob, je’el bix aj its’ato’ob, páatinadoro’ob, xoknáalo’ob yéetel uláak’ máako’ob, ti’al u páajtal u yutskíinsa’al yéetel u k’a’abéetkunsa’al tumen kaaj.

Edición: Ana Ordaz