K'iintsil
Astrid Sánchez
03/06/2026 | Mérida, Yucatán
U mola’ayil Secretaría de la Cultura y las Artes de Yucatán (Sedeculta) tu jets’aj jaaj úuchik u sa’atal u kuxtal j antrópologo Santiago Domínguez Aké, máax jach k’ajóolta’an yóok’oal meyaj u beetmaj ti’al u kuxkíinsa’al maaya miatsil, yéetel tumen tu jach péeksaj káan iik’ ti’ilil -lietaratura- ich maaya.
Yuum Santiagoe’ síij tu kaajil Muxupip, tu ts’áaj u muuk’il u meyaj ti’ ts’íib, beyxan j ka’ansaj yéetel tu kanaj xan fisioterapia.
Sedecultae’ tu yaj óoltaj úuchik u kíimil yéetel tu chíimpoltaj xan noj meyaj tu beetaj yóok’olal miatsil.
“Juntúul nojoch wíinik kaláantik maaya t’aan, beyxan maaya tuukul. Kuxlaj yéetel ts’íibnaj yóok’olal kool, meyaj yéetel maaya tuukul, tumen leti’e’ u k’áat u ye’es ba’ax u yojel kaaj, beyxan u na’at, tumen ma’ unaj u p’áatal chéen ich k’óoben wa ti’ soolari’, unaj xan u xo’okol, u ka’ansal yéetel u chíimpolta’al”, beey úuchik u ya’alal tumen Secretaría ti’ redes sociales.
J antropólogoe’ xooknaj tu kaajil Motul. Tu xokaj u preparatoria tu kaajil Jo’ yéetel tu ts’o’oksaj u xookil Antropología tu noj najil xook Facultad de Ciencias Antropológicas méek’a’an tumen Universidad Autónoma de Yucatán (UADY).
Ichil ba’ax ku béeytal u xo’okol tu yóok’olal ich Enciclopedia de la Literatura Indígena, ku yila’ale’ juntúul ti’ le yáax máaxo’ob táakmuk’t le ba’ax ku k’aba’tik Literatura Indígena tu ja’abilo’ob 90, tumen tu beetaj jejeláas ensayos yéetel ts’íibo’ob yóok’olal Felipe Carrillo Puerto, wa yóok’olal ba’ax ku beetik maaya kaaj.
Beyxan, meyaj tu kúuchil Dirección General de Culturas Populares yéetel tu ts’áaj maaya xook ti’ jejeláas najilo’ob xook, je’el bix xan uláak’ cursos yaan ba’al u yil yéetel ts’aak beyxan maaya fisioterapia.
Xak'alutskíinsa'an tumen: Sasil Sánchez Chan
