Kex tumen Julián Quiñones yéetel Raúl Jiménez tu yoksajo’ob gole’, juntúul kuuts ja’ táan u maas jach chíikpajal ichil u noj keetil báaxal fútbol Mundial 2026.
U noj lu’umil Méxicoe’ táan ka’ach u k’íimbesik úuchik u máan yóok’ol Sudáfrica ka’aj chúun báaxal káajs le noj keetilo’, ka’aj chíikpaj Merlín, juntúul kuuts ja’ ka’ap’éel u ja’abile’, yéetel u nook’il u selección México, ka’aj túun jach ki’iki’ óolta’al ti’ Internet yéetel uts k’a’amik beey u xma’ oficial aalak’il le keetilo’.
En español: Conoce a 'Merlín', el pato habitual de las calles de Ciudad de México, ahora mascota del Mundial
Jach séeb úuchik u k’i’itpajal u yoochelo’ob Merlín ka’alikil tu xíimbal yéetel u nook’il u múuch’ báaxalil México -beyxan u calcetín- tu bejilo’ob le kaajo’, ka’alikil u jach ki’iki’ óolta’al tumen uláak’ máako’ob. Beyxan jach séeb úuchik u chukik miilonesil u téenal jcha’anta’ab ti’ redes sociales. Jach beey magia úuchik u tíip’il ti’ redes, óoli’ je’ex mago Merlín tu beetaj magiai’.
“Taak k ilik Merlín te’el estadioo’”, tu ts’íibtaj juntúul máak te’el redeso’. “Kuuts ja’e’ juntúul k’a’anan ba’al ti’al México”, tu ya’alaj xan uláak’ juntúul. “Leti’e’ ba’ax jach ma’alo’ob ts’o’ok u chíikpajal Mundial”, a’alab xan.
Tu noj kaajil Ciudad de Méxicoe’ Merlíne’ ts’o’ok u káajal u jach chíimpolta’al. Kuuts ja’e’ suuk u láak’intik u yuumil, Carla Gómez, máax ku konik ja’ yéetel refrescos ti’ jump’éel chan carrito lalaj fin de semana. Ba’ale’ ka’alikil u meyaje’, Merline’ ya’ab u beetik u jats’uts t’a’anal yéetel u ki’iki’ t’a’anal, beyxan ya’ab u k’áata’al oochelo’ob ti’.
“Ma’ uts t t’aan k p’atik tu juunal ti’ k taanaj’; uts t t’aan ka taak tak éetel. K neene’”, tu ya’alaj Gómez. Beey túuno’, Gómez yéetel Merlíne’ tu much’ajubáajo’ob yéetel u máakilo’ob FIFA le lunes máaniko’ ti’al u ch’a’abal oochelo’ob yéetel ti’al u grabarta’al jump’éel comercial.
Xak'alutskíinsa'an tumen: Sasil Sánchez Chan
