Astronautail Christina Koch chíimpolta’ab máanika’ yéetel Premio Princesa de Asturias de la Concordia

Christina Koch, juntúul u astronautail Estados Unidos táakpaj tu noj meyajil misión Artemis II de la NASA tu bak’pachil Uje’,  chíimpolta’ab le miércoles máanika’ yéetel Premio Princesa de Asturias de la Concordia. 

Koche’ 47 u ja’abil, ts’o’oke’ u meyaje’ “ts’o’ok u ye’esik tak tu’ux ku náachtal wíinik, úuchik xan u yantal múul meyaj ti’al u béeytal, ts’o’oke’ béeychaj u yila’al ti’ bix k’a’aytabik u noj misiónil Artemis II: ‘Tierra, sois un equipo’”, beey jtso’ol tumen jurado ichil u actail.

X astronautae’ béeychaj u kóojol tak te’el Ujo’; leti’e’ yáax ko’olel béeykunsej. Misión xáanchaj kex kajunp’éel k’iino’obe’ tu máansaj jayp’éel técnico talamo’ob, ba’ale’ jach t’u’ulpachta’ab u beel tumen tuláakal yóok’ol kaab, yéetel chíimpolta’ab tumen nojoch políticos yéetel celebridades; u yáax túuntajil meyaj ku tukulta’al u beeta’al tu paachil k’iin tak te’el Ujo’. 

Ba’ale’ le je’elo’ ma’ leti’e’ yáax noj ba’al tu béeykunsaj Koch: tu k’iinil 18 ti’ octubre ti’ u ja’abil 2019 tu múul beetaj yéetel Jessica Meir, yáax espacial xíimbalil beeta’an chéen tumen ko’olel ichil tuláakal u k’ajla’ayil wíinik. Tu k’iinil 6 ti’ febrero ti’ u ja’abil 2020e’, suunaj Yóok’ol Kaab tu jo’oloj 328 k’iino’ob yanak te’el órbitao’, ba’ale’ le je’elo’ tu jets’aj túumben récord ti’ beyka’aj xáanchaj vuelo espacial beeta’an tumen juntúul ko’olel; ka’ache’ chéen 289 u p’éel k’iino’ob yaan, yéetel jbeeta’ab tumen Peggy Whitson.

Chíimpolale’, u ts’ook ti’ le waxakp’éel chíimpolal ku ts’a’abal tumen Fundación Princesa de Asturias. Te’el ja’aba’ táan u chíimpolta’al j argentinail báaxal fútbol Leo Messi (Deportes); j ts’íib Julian Barnes (Letras) yéetel químicos David Klenerman beyxan Shankar Balasubramanian yéetel jbiofísico Pascal Mayer (Investigación Científica y Técnica). Uláak’ ti’ le chíimpolta’ano’obe’, u estudioil animación Studio Ghibli (Comunicación y Humanidades), yéetel j historiador Timothy Garton Ash (Ciencias Sociales); x k’aay Patti Smith (Artes) yéetel Bóveda Global de Semillas de Svalbard (Cooperación Científica y Técnica).

Yéetel chíimpolale’ ku k’u’ubul 50 mil euros, ti’al u ts’o’okbal octubre, yéetel ku ts’a’abal ti’ jump’éel ceremonia kun beetbil ti’ kaajil Oviedo, España, tu’ux ku táakapajal u ajawilo’ob Felipe VI yéetel Letizia.

Xak'alutskíinsa'an tumen: Sasil Sánchez Chan