Le miércoles máanika’, p’el máanik 6 u taal u chíinil k’iin tu kaajil Venezuelae’, tu tíitubáaj lu’um ka’atéen, yóok’olal túun le je’elo’, yaan kúuchilo’ob jníik tu noj kaajil Caracas.
Servicio Geológico ti’ u noj lu’umil Estados Unidose’ tu ts’áaj k’ajóoltbile’, ka’aj tu yáax tíitubáaj lu’ume’ tu beetaj yéetel u muuk’il 7.1, yéetel u chuune’ ti’ yanchaj tu chik’inil u kaajil Morón, kex 168 kilómetros náach ti’ u chik’inil Caracas. U tíitkubáaj lu’ume’ taamchaj 13 kilómetros.
Tu jo’oloj chéen jayp’éel minutose’, USGSe’ tu ts’áak’ k’ajóoltbil tu ka’a tíitubáaj lu’um ba’ale’ maas jach chich ti’ le yáaxo’ tumen tu chukaj 7,5. Beey túuno’, ka tu ka’ tíitubáaje’, taamchaj 10 kilómetros, yéetel u chuune’ ti’ yanchaj 16 kilómetros tu nojol lak’inil Morón.
En español: Dos terremotos consecutivos sacuden Venezuela, provocando el derrumbe de edificios en Caracas
U kúuchil Centro de Alerta de Tsunamis del Pacífico de Estados Unidos tu k’a’aytaj u sajbe’entsil u yantal tsunamis tu noj lu’umil Puerto Rico yéetel Islas Vírgenes.
Tu kaajil Caracase’, kajnáalo’obe’ tu p’ato’ob kúuchilo’ob káaj u yóok’ot ka’aj p’áato’ob táankab; ya’abach ti’ leti’obe’ jak’a’an u yóolo’ob úuchik u yilko’ob bix níik le pak’o’obo’.
U ministroil Interior, Diosdado Cabello tu ya’alaj úuchik u tíitkubáaj lu’ume’ u’uypaj ti’ jejeláas estados yéetel tu k’áataj ti’ kaaje’ ka p’áata’ak táankab, tumen ma’ xaan wa je’el u ka’ péek lu’umi’.
Xak'alutskíinsa'an tumen: Sasil Sánchez Chan
