Ts’o’ok u máan lajunp’éel k’iino’ob úuchik u tíitikubáaj lu’um Venezuela. Yo’olal le je’elo’ ts’o’ok u kíimil kex 3 mil máak, beey ojéelta’ab ti’ ts’ook xook jbeeta’ab le sábado máaniko’, úuchik u xu’ulsa’al meyajo’ob táan u beeta’al ti’al u kaxta’al uláak’ kuxa’an máak tu yáamil le ba’axo’ob jníiko’obo’.
Maquinarias lúubsik kúuchilo’ob ts’o’ok u níikilio’ob úuchik u tíitikubáaj lu’um, meyajnaj ti’al u péeksik u lozasil u kúuchilo’ob La Guaira, kaaj naats’ yanik ti’ u noj kaajil Caracas, tu’ux xan jach u’uypaj u péek lu’um tu chichil 7.2 yéetel 7.5 le 24 ti’ junio máaniko’.
“Láayli’ táan k meyaje’, táan k kaxtik kimen wíinkilalo’ob. Ma’ chéen ch’a’abili’”, tu ya’alaj Francisco Sasquia ti’ AFP, leti’e’ juntúul voluntario ku máan áantaj, yéetel máax ku máan k’ext’aan tu kúuchil Ocean Beach, tu baantail Playa Grande.
U miniserioil Comunicaciones ti’ u lu’umil Venezuelae’ tu ya’alaj le sábado máanika’ yaan kex 2 mil 954 kimen máak, yéetel úuch loob kex ti’ 16 mil 592 u túul wíinik, úuchik u ka’atéen tíitikubáaj lu’um. U chichile’ jump’éel ti’ le maas jach k’a’am u’uypaja’an ich América Latina.
Walkila’ táan u bin u maas p’íittal áantaj máak ti’ táanxel kajil kaajo’ob ku yila’al tu bejilo’ob La Guaira. Yóok’olal le je’elo’ k’uch áantaj máak ti’ u lu’umil Estados Unidos, Chile yéetel uláak’o’ob; walkila’ táan u líik’sikubáajo’ob ti’al u luk’ulo’ob te’elo’, beey a’alab le sábado máaniko’.
Ichilo’obe’ ti’ yaan múuch’ meyaj máako’ob ti’ u Departamentoil Bomberos del Condado de Los Ángeles, beyxan múuch’o’ob ti’ u kaajil Florida yéetel Virginia.
U tuukulil u kaxta’al kuxa’an máak kéen úuchuk ba’alo’ob beya’, ku káajal u xu’ulul tu jo’oloj 72 horas úuchik, wa tu jo’oloj óoxp’éel k’iin.
Xak'alutskíinsa'an tumen: Sasil Sánchez Chan
