U noj e’esajil Dalí: Escenografía de un sueño, k’uch tak Palacio de la Autonomía ti’ u noj najil xook UNAM, tu k’íiwikil Centro Histórico, ti’ u noj kaajil Ciudad de México.
Yáax juntéen úuchik u k’ujsa’al e’esajil tu lu’umil Latinoamérica; le je’ela’ jump’éel colección privada tu’ux yaan maanal 80 original boono’ob jbeeta’ab tumen Salvador Dalí. E’esajile’ ts’o’ok u máan Estados Unidos, Inglaterra, Italia, Alemania, China yéetel Singapur.
U nooyil e’esajile’, ku chíikbesik bix núup u surrealista tuukul Salvador Dalí yéetel u tuukul Alfred Hitchcock. Tu ja’abil 1945, múul meyajnajo’ob tu cha’anil Spellbound –u k’aaba’ ich káastelane’, Recuerda– tu’ux chíikbesa’ab onírico meyaj jéets’ ichil u k’ajla’ayil cine yéetel arte. Beey túuno’, yóok’olal múul meyaj tu beeto’obe’, yanchaj túun u nooyil le e’esajila’, jump’éel nojoch boon ku p’isik 5 metros u ka’analil yéetel 10 metros u kóochil.
U cha’anil Spellbound, jbeeta’ab tumen Dalí ti’al u yantal u escenografíail náay ku beetik Gregory Peck; meyaje’ ku ye’esik ba’axo’ob jach péeksik u yóol le ka’atúul máako’obo’: u tojbe’en yantal u tuukul wíinik, k’a’ajesajil, paranoia yéetel saajkilo’ob.
Beey túuno’, yéetel nojoch boone’, yaan xan u ye’esa’al bocetos tu meyajtaj tu k’ab j catalán boon ti’al u béeytal u beetik le nojoch cuadroo’, ti’al beyo’ u béeytal u yila’al bix úuchik u beetik.
Ti’ tsikbal tu beetaj La Jornada yéetel Filippo Pandolfini, máax jo’olbesik Sensea Immersive, tu tsolaj u béeytal u k’ujsa’al e’esajile’, tu biinsaj kex jump’éel ja’ab yéetel uláak’ chúumuk ja’ab u meyajilo’ob ti’al u tsikbalta’al yéetel u tukulta’al bix kun beetbil. “Ku jach ku’umakúunsik k óol u béeytal k yáax k’ujsik México le e’esajila’, u jaajile’, yáax juntéen ich Latinoamérica. Boono’obe’ tu noj lu’umil Suiza yano’ob, ts’o’oke’ noj ba’al k ti’al u béeytal u k’uchul weye’”.
U ti’al u bin cha’antbil e’esajile’, ku béeytal u ma’anal boeltos tu kúuchil daliuniverse. mx. Chéen yaan u béeytal u yokol kex 50 máak lalaj media hora. Ichil las 10 ja’atskab k’iin tak las 6 u taal u yáak’abtal.
Xak'alutskíinsa'an tumen: Sasil Sánchez Chan
