Taak’in ts’o’ok u xu’upul ichil tuláakal yóok’ol kaab yóok’olal catástrofes ku yantale’ tu much’aj kex 100 mil millonesil dólares ichil u yáax wakp’éel winalo’ob ti’ u ja’abil 2026, le je’elo’ kaabal ti’ le ts’ook promedios ts’o’ok u yantal te’el ts’ook k’iino’obo’, ba’ale’ le je’elo’ ma’ tsaaj u k’áat u ya’al wa táan xan u p’íitchajal sajbe’entsil yaan, tu ya’alaj Swiss Re Institute.
“Jach ok’om óol bix táan u k’a’ajsal to’on lu’ume’ je’el u péek chéen je’el ba’axak k’iine’, je’el bix ts’ook úuchik Colombia yéetel Venezuela, tumen beey je’el u yúuchul tu ya’ab u k’áaxil América Latina, ts’o’oke’ le je’elo’ jump’éel ba’al je’el u k’askúuntik u kuxtal máak, kaaj yéetel tak bix u péek economías te’el kaajo’ob tu jach séeba’anil”, beey tu ya’alaj Santiago Arechaga, máax jo’olbesik reaseguros ti’al América Latina yéetel Caribe ich u mola’ayil Swiss Re.
Lela’ beey chíikbesa’ab yéetel le ba’ax j-úuch Venezuelao’. Yóok’olal le je’elo’ ya’abach ba’alo’ob pe’erchaj ti’ náajal taak’in, kex 20 mil millonesil dólares, ba’ale’ tumen ma’ ya’abach seguros ook tu paach, chéen junjaats ti’ le ba’ax úuch ku ch’a’anukta’ali’. Ti’al mola’ayo’ob yéetel economíase’, noj talam u yutskíinsik ba’ax seen k’aschaji, ba’ale’ beyxan u ka’ ch’a’ak u yóol yéetel u xíimbal tu beel beyo’.
Swiss Re tu ya’alaj ba’axo’ob je’el bix u yantal máax tu’ux sajbe’entsil yéetel u maas ko’ojtal u yutskíinsa’al ba’ale’, ku beetik u maas talamtal bix u ch’a’anukta’al le ba’axo’ob bíin úuchuk tu paachil k’iin.
Ti’ jump’éel xaak’al beeta’ab tumen Swiss Re Institute, k’aaba’inta’ab: First-half 2026 insured natural catastrophes losses below trend, rising risks, a’alabe’ u tojol u ka’ líik’sa’al ba’ale’ ts’o’ok xan u ko’ojtal, le beetike’ maas je’el u talamtal bix u k’a’abéetkunsa’al taak’in ti’ je’el ba’axak bíin úuchuke’.
U kanik nojlu’umo’ob u jatso’ob u taak’inil meyaj -inversión- yéetel u p’íitkunsa’al sajbe’entsil ku yantal kéen kóojok desastree’ maas yaan u k’a’ananchajal ti’al u kaláanta’al activos, operaciones yéetel u páajtalil u ka’ ch’a’ak bej economías.
Xak'alutskíinsa'an tumen: Sasil Sánchez Chan
