U jala’achil indiail kaajilo’obe’ tu jets’ajo’ob u táanilkunsiko’ob jejeláas ba’alob ti’al u chan éensa’al u sajbe’entsil u páak’al ti’ máak u k’oja’anil COVID-19 ka’alikil táan u cha’anil ‘Ganesh’, jump’éel ti’ le asab k’a’anan k’iimbesajil yaan tu noj lu’umil India; káaj le sábado máanika’.
Lajunp’éel k’iino’ob ku xáantal le cha’ana’, ka’alikile’ ku beeta’al jejeláas tíich’óolalo’ob tumen máaxo’ob ku bin u k’iimbeso’ob tu k’áak’nabil Arabia, tu’ux ku biinsa’al u nukuch chíikulalo’ob hindú k’ujil ‘Ganesh’, chúumuk wíinik, chúumuk éelefantée.
Walkila’ ta’aytak u náakal óoxp’éel millonesil máako’ob tsaayal ti’ coronavirus tu lu’umin India, ts’o’okole’ maanal ti’ 56 mil u túul máak ts’o’ok u kíimil tu yóok’lal. U ya’abil ti’ le indiail kaajo’obe’ ts’o’ok u jets’iko’ob ba’ax k’a’anan u beetik kaaj ti’al ma’ u jach k’i’itpajal le k’oja’ana’ ichilo’obi’, u jach k’a’ananile’ leti’e’ tu’ux ku k’áata’al ka biinsa’al chéen chichan chíikulalo’ob ti’ u yuumtsilo’obi’.
Yaane’, je’el u p’isik tak 10 metros u ka’analil, ts’o’okole’ unaj ya’abach máako’ob tu paach, ba’ale’ walkila’, jala’acho’obe’ tu k’áatajo’ob ma’ u píitmáansiko’ob 1.10 metros.
