U temperaturail u yóok’kabil u k’áak’náabilo’ob yóok’ol kaabe’ ts’o’ok u na’akal tak tu jach ka’analil yáax xoka’an, beey a’ala’ab tumen Servicio de Cambio Climático de Copernicus de la UE (C3S, yóok’olal bix u káajbal u ts’íibil inglés).
Ichil ba’ax jts’a’ab k’ajóotbile’, le fin de semana máaniko’, tu píitmáansaj u temperatura mediail le k’áak’náabo’, tu’ux ma’ táaka’an tak polar bantailo’ob, k’uch tak 21.10 grados centígrados.
Récord yaan ka’ache’, je’ets’ tu yáax k’iinil marzo ti’ u ja’abil 2024, ka’aj chokochaj ja’ tak ka jk’uch 21.09 grados centígrados.
En español: Temperatura de la superficie del océano mundial alcanzó los 21.10 grados, un nivel récord
Táanil ti’ lelo’, C3S tu ya’alaje’, ba’axo’ob ku taal tu paach u chokojtal k’áak’náabo’obe’ ts’o’ok u káajal u chíikpajal Europa, tu’ux táan u yila’al u yóok’kabil u k’áak’náabil Atlántico yéetel u chik’inil Mediterráneoe’ yanchaj ba’al u yil yéetel le seten ooxol tu beetaj te’el ja’o’, ts’o’oke’ tu beetaj xan u jelpajal u kuxtal máaxo’ob yaan te’el jáal ja’o’ beyxan ba’ax bak’pachtik.
Beyxan u ajxaak’al máakilo’ob Instituto Oceanográfico y Antártico del Ecuador (Inocar) ts’o’okili’ u ya’aliko’ob ooxol táan u beetik tu ja’ilo’ob u k’áak’náabil yóok’ol kaabe’, ku núupul xan yéetel El Niño, jump’éel ba’ax táan xan u jelpajal bix u yu’uba’al tu k’áak’náabilo’ob Pacífico tropical.
Xak'alutskíinsa'an tumen: Sasil Sánchez Chan
