U múuchil’o’ob áantaje’, péeknaj le jueves máanika’ ti’al u kaxtiko’ob ya’abach máak jsa’at tu xuul kaajil Nepal yéetel Tibet, úuchik u jach séeb búulul kaaj yéetel tumen áalkabnaj luuk’ xan. Yóok’olal le je’elo’ ts’o’ok yantal kex 160 kimeno’ob.
Ya’abach ti’ le máaxo’ob saatale’, táanxel kajilo’ob, beey úuchik u ya’alal tumen u jo’opóopilo’ob kaaj ba’ale’ láayli’ táan u pa’ata’al u yojéelta’al jach jaytúul máak jkíim yóok’olal. “Tin wilaj bix úuchik u biinsa’al kex waxakp’éel wa bolonp’éel camiono’ob, beyxan najo’ob yéetel máako’ob”, tu tsikbaltaj Suman Chalise, juntúul jka’ansaj 34 u ja’abil, ti’ u kaajil Nuwakot, Nepal. “Jach yaj óol ba’ax úuchij (…) tin wilaj nojoch loobilaj le j-úucho’, mix juntéen in yáax il ba’al beyo’”, tu ya’alaj.
U polisil Nepale’ tu ya’alaj béeychaj u kaxtik 157 wíinkilalo’ob, ka’alikil áantaj máako’obe’ láayli’ u máan u yilo’ob wa yaan máax láayli’ kuxa’an naats’ ti’ jump’éel wiits, ba’ale’’ talam u k’uchul máaki’, tu bak’pachil Himalaya.
En español: Aumentan a 362 los muertos por deslave en Nepal y más de mil 400 desaparecidos
Beey túuno’, u jo’olpóopil china cadenail CCTVe’ tu ya’alaj láayli’ yaan u yila’al máaxo’ob le j-úuch loobo’. Áantaj máako’obe’ tu yilajo’ob bix u péeko’ob ichil le luuk’o’ob, tu jo’oloj mu’ukuk ya’abach máak ka búul le kaajo’obo’. KEx 403 ajxíinximbal máako’ob -341 u túulale’ táanxel kajilo’obts’o’oke’ láayli’ ma’ xan kaxta’ako’ob kex ts’o’ok u máan jayp’éel horas úuchuk, beey tu ya’alaj Ministerio de Turismo de Nepal.
Ichil táanxel kajil máako’ob saatale’ yaan kex 142 indioilo’ob, beyxan u máakilo’ob Australia, Reino Unido, Malasia, Países Bajos, Portugal, Sudáfrica, Corea del Sur, Ucrania yéetel Estados Unidos, a’ala’ab tumen Junta de Turismo.
Ma’ sáasil yanik ba’axten búul le kaajo’obo’, le beetik u cancilleril Nepal, Shishir Khanal, tu ya’alaje’ míin péeknaj lu’ume’ ka tu cha’ajubáaj lu’um tak ka áalkabnaji, ts’o’oke’ lelo’ tu k’ataj u beel jump’éel ríoe’, le beetik ka’anchaj le ja’o’.
Xak'alutskíinsa'an tumen: Sasil Sánchez Chan
