Cristhian Pachecoe’ jp’áat ichil u múuch’il máak táanil u bin ti’ le yáax 25 kilómetros ichil u 43 u téenal u beeta’al u nojkeetil Maratón Internacional de la Ciudad de México.
Jperuile’ juntakáalili’ úuchik u bin tak kilómetro 30, tumen leti’e’ ka káaj u táanilchajale’ tak ka’aj jk’uch tu ts’ook u bejil le áalkabo’. “Walkil jayp’éel winalo’ob paachil ka káaj k tukultik yéetel in entrenador bix u maas ma’alobil u yáalkabta’al le nojkeetila’, ts’o’oke’ láaj jóok’ tu beel. Jach talam le nojkeetilo’, ts’o’oke’ tuláakalo’on t ilaj u talamil yóok’olal le alturao’, ba’ale’ tin béeykunsaj”, tu ya’alaj máax náajalt u yáax kúuchil, máax jbin lu’um p’el úuchik u máansik meta. Pachecoe’ tu yáalkabtaj 2:10:03 horas; tu paache’ yanchaj etiopeilo’ob Anbesa Lencho (2:11.25) yéetel Balew Yihunie (2:11.58).
“Ku béeytal u ganarta’al le africailo’obo’. Talam u chukpachta’alo’ob, ba’ale’ wa ka jach entrenar tu beele’, ku béeytal”, tu ya’alaj Pacheco. Jkeniail Boaz Kipkemi máan táanil le yáax kilémtroso’, ts’o’oke’ tu paache’ ti’ yanchaj jboliviail Héctor Garibay -máax náajalt nojkeetil tu ja’abil 2023- beyxan Pacheco, panamericanoil bicampeón.
Ba’ale’, ma’ béeychaj u chukpachtik u maasilo’obo’ ka’aj p’áat paachil; ma’ jna’ak podioi’. Tu keetil ko’olele’, Etiopía béeykuns le yáax óoxp’éel kúuchilo’obo’. Kasegn Alemtsehay táanilchaj úuchik u yáalka’abtik 2:29:30 horas, tu paache’ ti’ yanchaj Gebremedhin Kidsan (2:32.23) yéetel Tefera Kolole (2:34.04). Ichil bejo’ob tu’ux úuch áalkabe’ ti’ yanchaj Insurgentes Sur, Avenida Chapultepec, Paseo de la Reforma, Ejército Nacional yéetel Avenida Juárez; u ts’ook beje’, tu’ux ts’a’ab metae’, ti’ yanchaj Centro Históricoi’. Tu jaats keetil siila de ruedas, Brenda Osnaya máan táanil.
Ichil tuláakal beje’ mixmáak béeychaj u chukpachtik. Láayli’ ti’ le jaats je’elo’, k’uch Jenny Hernández tu ka’ kúuchil yéetel María Luisa Morales, tu yóox kúuchil. Ichil u keetil xiibe’, nojkeetile’ béeykunsa’ab tumen Gonzalo Valdovinos; u ka’ap’éele’ Pedro Gandarilla yéetel Marco Antonio Caballero, tu yóox kúuchil.
Xak'alutskíinsa'an tumen: Sasil Sánchez Chan
