Chak ik’al Polo, de u muuk’il categoría 5e’, láayli’ jelekbal tu táan u jáal ja’ilo’ob Guerrero, yéetel u muuk’il u yiik’ale’ ku chukik 285 kilómetros por hora, ts’o’oke’ je’el tak u maas mu’uk’anchajale’, le beetike’ leti’e’ masa mu’uk’a’an chak ik’al ts’o’ok u yantal desde káajak u beeta’al registros, beey jts’a’ab k’ajóoltbil tumen Servicio Meteorológico Nacional (SMN).
K’a’amkach ja’e’ ti’ yaan kex 345 kilómetros náach ti’ u noojolil Zihuatanejo, Guerrero, yéetel kex 570 kilómetros tu noojolnojolak’in Manzanillo, Colima, beey úuchik u ya’alal tumen Comisión Nacional del Agua ti’ reporte jts’a’ab las 15:00 horas.
En español: Huracán 'Polo' se degrada a categoría 4; alertan por lluvias y oleaje en 5 estados del Pacífico
Ichil uláak’ ba’axo’ob a’alabe’, ku tukutla’al chak ik’ale’ tu béeyili’ kun p’áatal yéetel le beyka’aj u muuk’o’ tak tu k’iinil jueves, ts’o’oke’ yóok’olal modelos meteorológicos, ku tukulta’al yaan u yáalkab tu jáal ja’ilo’ob México tu baantail xamanlak’in; lelo’ ku beetik u tukulta’al ma’ táan u kóojol ti’ kaaj ba’ale’ yaan u beetik u k’áaxal k’a’amkach cháak tu lu’umilo’ob Colima, Michoacán, Guerrero, Oaxaca yéetel Jalisco.
Fabián Vázquez Romaña, máax jo’olbesik u meyajil SMN, tu ya’alaj Poloe’ láayli’ táan u mu’uk’anchajal, ts’o’oke’ u presión mínima centrale’ ku chukik 892 milibares. Le je’elo’ u k’áat u ya’al presión atmosférica yaan tu nak’ chak ik’ale’ maas ma’ mu’uk’a’ani’, ba’ale’ sajbe’entsil tumen tu bak’pachile’ jach mu’uk’a’an, je’el bix úuchik yéetel Patricia tu ja’abil 2015.
Poloe’ xáanchaj 18 horas ti’al u ch’a’ak u muuk’; chéek k’a’amkach cháak ka’achij ba’ale’ jsúut chak ik’al tu maas mu’uk’a’anil u ja’atsal ich u escalail Saffir-Simpson.
Xak'alutskíinsa'an tumen: Sasil Sánchez Chan
