U nojmola’ayil ONUe’ tu k’áataj le miércoles máanika’ ka “séebchajak” u beeta’al ba’al ti’al u kaláanta’al máaxo’ob maas jach je’el u ja’ats’alo’ob tumen El Niño, tumen jump’éel ba’al “mix juntéen yáax ila’ak” ts’o’oke’ “jach píitmanja’an ti’ escalas jets’a’an ti’al u yila’al bix u máan”, tumen 3.8 grados ka’anal yanik ti’ le mediao’.
“Walkila’ k beetik páayt’aan ti’al u séeb yéetel u múul beeta’al wa ba’al (...) tumen ma’ táan u béeytal u ch’éejsa’al El Niño, ba’ale’ ku béeytal k kaláantik ma’ u yúuchil ya’abach k’aasil ba’al ti’ wíinik”, tu ya’alaj ti’ prensa tu noj lu’umil Ginebra le máax beetik secretaria general ich Organización Meteorológica Mundial (OMM), Celeste Saulo.
X-argentinaile’ tu beetaj páayt’aan yéetel máax jo’olbesik operaciones humanitarias ichil u mola’ayil ONU, Tom Fletcher, ti’al u yila’al ka k’as sa’atak ba’ax ku taal tu pach fenómeno yaan u beetik u na’akal temperatura ti’ u ya’abil u lu’umilo’ob yóok’ol kaab, tumen yaan xan u beetik u maas piimkunsik yáax k’iin yéetel búulkabilo’ob. “Jach nojoch ba’al bix táan u máan El Niño.
Jach yaan u muuk’ ti’al u k’askúuntik ba’al (…) yaan u jach jats’ik América Latina, u lak’inil yéetel u noojolil África oriental, Asia yéetel tu baantail Pacífico”, tu ya’alaj Fletcher, máax sajak ka yanak “noj” talamilo’ob ti’ wíinik.
En español: La ONU alerta de un fenómeno El Niño ''sin precedentes''
“Lela’ yaan u beetik xan u beetik u p’úuchul náajal taak’in (…) yéetel yaan u maas tséentik talamo’ob yaan, u yantal u luk’ul máak tu kaajal yéetel u bin máak táanxel kaajo’ob”, tu ya’alaj.
Le beetike’ jach “najmal u péek ba’al yéetel u yantal nojmúul meyaj ichil ya’abach noj lu’umo’ob”. Tu k’a’aytaj ts’o’ok u péeksa’al maanal 50 millonesil dólares ikil ts’a’an meyaj u fondoil u séeb beeta’al meyajo’ob ti’al u xchukul ts’aatáanta’al ba’al, tumen u mola’ayil Oficina de Coordinación de Asuntos Humanitarios ichil u mola’ayil ONU (Ocha) ti’al u yáanta’al bulukp’éel nojlu’umo’ob tu’ux táaka’an Chad, El Salvador, Etiopía, Somalia yéetel Sudán del Sur
Xak'alutskíinsa'an tumen: Sasil Sánchez Chan
