Jk’uba’ab ti’ Charlyn Corral u noj chíimpolalil Delantera del Año, ichil u galail Balón de Oro 2026

Xmexicoil Charlyn Corral, máax ku báaxal ichil u múuch’ báaxalil club Pachuca, chíimpolta’ab yéetel u premioil Delantera del Año 2026 ichil u noj galail Balón de Oro. Xbáaxale’ leti’e’ yáax fustbolista siijil tu noj lu’umil México chíimpolta’an te’ jaatsilo’. 

Yéetel u jach jats’uts boox nook’e’, jk’uch tu súutukil le chíimpolalo’. Corrale’ tu ts’áaj u níib óolal ti’ u láak’tsilo’ob yéetel u yéet báaxalo’ob. Beyxan, tu ya’alaj u k’a’ananil ba’axo’ob ts’o’ok u béeykunsa’al ichil u báaxalil futbol ti’al ko’olel yéetel u nojba’alil xan Scarlett Camberos, máax ku báaxal beey delantera ichil u múuch’il  América, úuchik u yantal ichil u tsoolil le 30 maas jach ma’alob xfustbolistas yaan ichil tuláakal yóok’ol kaab ichil u nojchíimpolalil Balón de Oro principal.

“Jach ki’imak in wóol yaniken weye’, yáax mexicoil ko’olel k’amik le chíimpolala’. Nojba’al in ti’al, tumen in wojel yaan ba’alo’ob táan u beetik in nojlu’umil ichil u báaxalil futbol ko’olel. Je’el bix u wéet báaxal Scarlett (Camberos), máax xan ch’a’achibta’ab u k’aaba’ ichil yáax 30 ko’olel, le beetik taak in k’áatik ka k papaxk’a’abtej”, tu ya’alaj yéetel ki’imak óolal.  

“Tu jo’oloj ya’abach golese’, ti’ kex 20 ja’abo’ob wa maanal ti’ káajak in báaxale’, kin wilike’ meyaj yéetel k’ub óolale’, ts’o’ok u ts’áak u yich. Kéen a beet ba’alo’ob yéetel a wóole’, ba’ale’ beyxan yéetel a puksi’ik’ale’, ku yantal u yich”.

“Kin ts’áak u níib óolalil ti’ u múuch’ báaxalil Pachuca, ti’ máaxo’ob jo’olbesik, ti’ u jo’olpóopilo’ob, entrenadores, ajmeyajo’ob. Ba’ale’, beyxan ti’ in wéet báaxalo’ob, kexi’ wa táan u yilikeno’obe’, tumen le chíimpolala’ a laj ti’ale’ex”, tu ya’alaj.  

Ichil u jaatsk’iinilo’ob báaxal 2024-2025 ti’ u keetil Liga Mx Femenil yéeetel Pachucae’, Charlyn Corral tu béeykunsaj 39 goles ichil u jaatsil regular. 

“Kin ts’áak u níib óolal ti’ in yuumo’ob, in suku’un, máaxo’ob chúunsik yéetel méek’ik in beel”, tu ya’alaj xmexicoil. “Níib óolal ikil a t’u’ulpachtike’ex in tuukulo’ob, ba’ale’ beyxan tumen te’ex in muuk’ile’ex yéetel tumen ta wáantene’ex in páaktik in beel ichil le futbolo’”.