X activista péeknaja’an yóok’olal cambio climático, Greta Thunberg, jk’uch le martes máanika’ ti’ u nojmúuch’tambal ONU, tu’ux tu ya’alaj u maas jach k’a’abéetil u kaláanta’al máak yéetel yóok’ol kaab antes ti’ náajal taak’in.
U múuch’tambalil le ja’aba’, k’aaba’inta’ab Conferencia de las Partes, wa COP31, táan u beeta’al tu jo’oloj jump’éel ja’ab jach yanak u k’iinilo’ob chokoj yooxol yanchaj yóok’olal cambio climático yéetel uláak’ talam ba’alo’ob.
Ka jk’uch ti’ múuch’tambal ku beeta’al tu kaajil Antalya, Turquíae’, Thunberg tu ya’alaj cambio climáticoe’ “ku laj p’atik ba’al ich sajbe’entsil” ts’o’oke’ “tuláajak ba’ax yéetel máax k yaabilmaje’ sajbe’entsil yanik”.
“Unaj k séeb péek ti’al k kaláantik yéetel ti’al k beetik uts ti’ wíinik, tu lugar k tselik u ya’abil ba’ax kuxa’an ti’ le lu’umkabila’, tu’ux laj kaja’ano’on, tumen wa ma’e’, chéen jaytúul ayik’al máak ku jach yantal u yutsil ti’, yéetel ku p’a’atal tu k’abo’ob u muuk’il u je’ets’el geopolítico ba’al”, tu ya’alaj ti’ prensa.
Yáax juntéen úuchik u bin Greta te’ múuch’tambal desde ka táakpaj COP tu ja’abil 2021, tu kaajil Glasgow, Escocia, tu’ux tu yéets’taj chéen beey “bla, bla, bla” t’aan mokt’anta’ab te’ múuch’o’.
Tu ja’abil 2024e’, táakpaj Thunberg ti’ awat t’aan jbeeta’ab yóok’olal Georgia ti’al ma’ u p’a’atal ti’ Azerbaiyán u tsikbalil yóok’olal clima te’ ja’ab je’elo’. Tu ya’alaj le nojlu’umo’ tu k’a’abéetkunsaj múuch’tambal ti’al “u p’o’ok k’aasil ba’ax ku beetiko’ob yéetel péech’ óolal yóok’ol u páajtalil wíinik”.
Táan u pa’atal ka béeyak u tsikbal x activista ti’ le múuch’tambal yaan te’ ja’aba’. Tu ya’alaj xane’ jach k’a’abéet u beeta’al noj k’eexilo’ob ichil tuláakal yóok’ol kaab ti’al u aktáanta’al talamilo’ob yaan tumen sistemas políticos yéetel económicos yaan walkila’ “ma’ toj yanik yéetel u yutsil kuxtal wíinik”.
Xak'alutskíinsa'an tumen: Sasil Sánchez Chan
