de

del

Yáax juntéen u jo’olbesa’al jump’éel u kanan cheemil Semar tumen juntúul ko’olel

Por primera vez, una mujer asume el mando de una patrulla de Semar
Foto: Twitter @SEMAR_mx

Eduardo Murillo

Te’e k’iino’oba’ úuch jump’éel ba’al mix juntéen yáax úuchuk: jo’olbesa’ab tumen juntúul ko’olel jump’éel Patrulla Costera ti’ u mola’ayil Secretaría de Marina (Semar).

Leti’e’ u Teniente Fragatail Cuerpo General Gloria Carolina Cházaro Berriel, máax ts’a’aban beey u Segundo Comandanteil ti’ Patrulla Costera ARM Bonampak (PC-339), máax táan u jo’olbesik le chema’ chéen jayp’éel k’iino’ob, ka’alikil u suut u nojochil Primer Comandante.

Patrulla Bonampak jóok’ u biinbal le sábado máanika’ tak tu k’áak’nabil Mazatlpán, Sinaloa, úuchak u k’ubenta’al ti’ob u máano’ob “kanan, kaaxan yéetel u jach iliko’ob ma’ u yúuchul mix ba’al k’aas, ti’al beyo’ ma’ u xu’ulul u yantal jeets’el kuxtal ti’ kajnáalo’ob yano’ob naats’ ti’ le k’áak’nabo’”.

Semare’ tu ts’áaj k’ajóoltbile’, ichil u k’ajla’ayil Armada de México, yáax juntéen u jo’olbesa’al jump’éel cheem je’el bix le je’ela’ tumen juntúul ko’olel, ts’o’okole’, tu k’abe’ ti’ yaan 15 u túul ajmeyajo’obi’.

Teniente Cházaroe’ tu ts’o’oksaj u xook ti’ Heroica Escuela Naval Militar, yéetel u asab ma’alob promedioil ichil u yéet xooko’ob, ts’o’okole’ tu náajaltaj xan jump’éel beca ti’al u xokik Maestría en Seguridad y Estrategia Aplicada, tu noj najil xook Universidad de Exeter del Reino Unido.

Edición: Ana Ordaz