Te’e k’i’ino’oba’ jts’a’ab k’ajóoltbile’ éejenta’ab u k’a’abéetkusna’al Ley Olimpia tu lu’umil Quintana Roo le ken ka’a’abéetchajak, ts’o’okole’ Defensoras Digitalese’ táan u túulch’inajo’ob ti’al u éejelta’al óoxp’éel u jéejek’al: u ko’onol, u beeta’al yéetel u líik’sa’al oochelo’ob wa cha’ano’ob ma’ cha’aban ti’ob tumen u yuumili’. Tu winalil febrero tak walkial’, múuch’kabile’ ts’o’ok u yáantik maanal ti’ cien u túul ko’olel ti’ u lu’umil Quintana Roo, yaan u ja’abilo’ob ichil 15 tak 20, máaxo’ob ti’ beeta’an loobilaj k’ajóolta’an beey violencia digital, tumen yaane’ juntúul u láak’ beet k’aas ti’obi’.
Le sábado máanika’, u XVI Legislaturail le noj lu’umo’, tu éejentaj ichil u meyajil sesión ordinariaa’ u káajal u meyaj Ley Olimpia te’elo’, le beetik yanchaj u k’e’exel ba’ax jeets’el tu jaatsil VIII ti’ u ts’íibil Cuarto de Delitos tu’ux ku ya’alal jejeláas ba’alo’ob yóok’lal libertad sexual beyxan seguridad sexual ti’al u páajtal u ts’a’abal xan violencia digital ichil u a’almajt’aanil Ley de Acceso de las Mujeres a una Vida Libre de Violencia y al Código Penal.
Yéetel le a’amajt’aana’ ku je’ets’el je’el u ts’a’abal u si’ipil máak ichil kamp’éel tak waxakp’éel yéetel ichil 200 tak 500 u p’éel k’iino’ob ti’al u bo’ot máax bíin u k’i’itbes, u jóok’es, u ts’áak k’ajóoltbil, u máansik wa u jelbesik je’el ba’axak oochel, ts’íibtsikbal, táabsaj t’aan, cha’ano’ob wa uláak’ sexual ba’alo’ob ti’ uláak’ juntúul máak, yaan ti’ wa maanal 18 u ja’abil, ts’o’okole’ ma’ cha’aban ti’ tumen máax ti’alintiki’.
