U yuumil nojoch mola’ayob, u múuch’kabilo’ob política, kúuchilo’ob k’a’aytik péektsilo’ob beyxan u ajts’íibil péektsilo’ob México yéetel uláak’ táanxelil lu’umo’ob, ajxak’al xooko’ob, éekonomistaob, aj-its’ato’ob, beyxan múuch’kabilo’ob meyaje’, ma’ xu’uluk u ya’aliko’ob k’aasil ba’alo’ob yóok’lal u jala’achil u lu’umil México, Andrés Manuel López Obrador, kex tumen chéen ts’o’ok u máan 21 winalo’ob táan u beetik u jala’achil, ba’ale’ leti’e’ ma’ chi’ichnaki’, mix péeka’an u yóol yóok’lal le ba’ax ku yúuchula’.
Kex yéetel tuláakal ba’ax ku yúuchule’, jala’ache’ láayli’ u ts’aamaj u yóol ti’al u táakmuk’tik tuláakal ba’al yaan u yil yéetel libertad de expresión yéetel ti’al xan k’exik ya’abach ba’al.
Ku ya’alale’ ma’ táan u na’atik tuláakal ba’al yaan u yil yéetel u jeel kuxkíinsa’al k’áax, ba’ale’ táan u jach táakmuk’tik jump’éel u meyajil réeforestacsión táan u beeta’al yóok’ol kaab, ts’o’okole’ táan xan u líik’sik u meyajil energías limpias ikil u tóoch’balkunsik úuchben hidroeléctricas. Beyxan ku ya’alale’ kúulpach u na’atik feminismo, kex tumen ichil u máaxo’ob ku meyajo’ob yéetele’ keetel yanik ko’olel yéetel xiib.
Ti’ jump’éel k’áatchi’ tsikbal tu beetaj yéetel La Jornada tu kúuchil Palacio Nacional, úuchak u beetik U Ka’atsoolil meyaj jala’ach, López Obradore’ tu jeel jets’aje’, leti’e’ juntúul máak ku ba’atel yóok’lal u kuxtalil u kaaj, ts’o’okole’ ku yilik yaan u ch’éenel u beetik u jala’achil tu jo’oloj wakp’éel ja’abo’ob.
“Yaan u ts’o’okol in meyaj, wa ka u yóot kaaje’, tu ja’abil 2024, yéetel ken úuchuke’ ma’ táan in táakpajal tuka’atéen ti’ política, mix xan tin wóotik in táakbesinbáaj ti’ mixba’al yaan u yil yéetel política”.
Beyxan míin je'el u yutstal ta wiche': AMLO, 21 meses en el mando contra viento y marea
Edición: Ana Ordaz
