Ka’alikil u tsikbalta’al ba’ax ts’o’ok u béeykunsa’al yéetel ba’ax ma’ jach jóok’ok tu beel ichil u ka’ap’éel ja’abil meyaj ts’o’ok u beetik u jala’achil u lu’umil México, Andres Manuel López Obrador, leti’e’ ku ya’alike’ kex mantats’ yaan máax ku t’aan wa ku beetik k’aas tu yóok’ole’, “tu’ux ts’o’ok u yóota’al u luk’sa’al kmuuk’e’” ts’o’ok u jóok’ol ti’ tuláakal le ba’alo’obo’ “tumen ma’ táakmuk’ta’an tumen mix jump’éel múuch’ máak, mix xan tumen mix jump’éel kúuchil k’a’aytik péektsilo’ob, ba’ale’ yaan wa jayp’éel uts u beetik u meyajo’obi’”.
Ichil u ka’a jaatsil tsikbal beeta’ab yéetel jala’ach tumen La Jornadae’, tu ya’alaje’ meyaj u beetmaje’ ku na’atik bix u yúuchul u meyajil jala’ach; jáalk’ab lu’umo’ob, kchíimpoltik uláak’ noj lu’umo’ob, ts’o’okole’ le je’elo’ u chíikulal táan óol ts’o’ok knáajaltik úuchak u béeytal u je’ets’el mokt’aan ichil Estados Unidos beyxan Canadá.
Jala’ache’ ku ya’alike’ táan u bin k’éexel ba’al yóok’lal u yáantajil kaaj, táan u béeytal u k’éexel le noj lu’uma’, ba’ale’ ku ya’alik xane’, ma’ chéen ch’a’abil u ch’a’anukta’al ba’ax ku seen beeta’al ti’.
Edición: Ana Ordaz
