de

del

Foto: Presidencia

Gustavo Castillo, Eduardo Murillo y Alonso Urrutia

U jala’achil u lu’umil México, Andrés Manuel López Obrador, tu jo’olbesaj meyaj suuk u beeta’al ja’ab man ja’ab ti’al u k’a’ajsa’al ba’ax k’ajóolta’an beey Independiencia ti’ u lu’umil México, tumen te’e ja’aba’ táan u chukik 210 ja’abo’ob. Ti’al le k’a’ajesajila’ táakpaj 671 u túul máako’ob táakpaja’anob ti’ fuerzas armadas tu beetajo’ob xíimbal e’esajil tu kúuchil Plaza de la Constitución, ba’ale’ te’e ja’aba’, tu yóok’lal táan u máan pak’be’en k’oja’anile’, ma’ yanchaj u ya’abil máax cha’antik je’el bix suuk u yantal lalaj ja’ab ti’al le k’iimbesaja’.

Ma’ili’ káajak xíimbal e’esajile’, jk’u’ub u chíimpolalil “Miguel Hidalgo” ti’ 58 u túul u ajmeyajiko’ob toj óolal -ts’akyajo’ob yéetel x-áantaj ts’akyaj-, máaxo’ob jach chikpaja’an u meyajo’ob yéetel ba’ax ku beetiko’ob sáansamal ti’al u tojtal u yóol máaxo’ob tsaayal ti’ob u k’oja’anil COVID-19.

Beyxan, p’ata’ab u chan súutukil ch’eench’enkil ti’al u k’a’ajsa’al u ajmeyajilo’ob toj óolal ts’o’ok u sa’atal u kuxtalo’ob ka’alikil táan u meyajo’ob yóok’lal u pak’be’en k’oja’anil ku máan yóok‘ol kaab te’e k’iino’oba’.