Te’e ja’aba’, u k’iinil Día Mundial del Turismo yaan u jula’al ba’ax k’ajóolta’an beey turismo rural, le beetike’, máaxo’ob beet u xíinximbalil meyaj tu lu’umil Quintana Rooe’ tu beetajo’ob jump’éel nu’ukbesaj tukulta’an u beeta’al 27 ti’ septiembre tak 2 ti’ octubre.
“Ti’ le ts’ook winalo’oba’ patjo’olta’ab jump’éel meyaj ti’al u mu’uk’ankúunsa’al mola’ayob beetik turismo local, ecoturismo, k’áax, miatsil yéetel u beeta’al janabe’enbalo’ob”, beey úuchik u ya’alik máax jo’olbesik Secretaría de Turismo ti’ le lu’umo’ (Sedetur), Marisol Vanegas Pérez.
Tu ya’alaj xan: “Ti’al u k’a’ajsa’al Día Mundial del Turismoe’, u lu’umil Quintana Rooe’ ku nojba’alkúunsik máax meyajtik tuláakal ba’ax yaan u yil yéetel turismo; u ajmeyajilo’ob Sedeture’ ksúutul beey máaxo’ob tsikbaltik u xíinximbalil ya’abach máako’ob kk’amik, xma’ bo’olil ti’al beyo’ u páajtal u náaysik u yóol k-ajmeyajo’ob yéetel u láak’tsilo’obo’, tumen beyo’ je’el u k’ajóoltiko’ob u lu’umo’ob yéetel je’elili’ u ki’imaktal u yóolo’ob tumen quintanaroilo’ob, ti’al beyo’ u jach ki’iki’ óoltik meyaj ku beetiko’ob.
Ba’ale’ te’e ja’aba’, ma’ táan u páajtal kmuch’kíinsik ya’abach máak, le beetik t-tukultaj kbeetik meyajo’ob ti’ le p’iis k’inila’ ti’al u k’ajóolta’al u meyajil turismo ku beeta’al tu mejen kaajilo’ob Quintana Roo”.
Te’e nu’ukbesajo’ tukulta’an u jóok’sa’al jump’éel payalt’aan ti’al u chíimpolta’al u asab ma’alob nu’ukulil beeta’an tumen turismo rural, tu k’iinil 28 ti’ septiembre; u ts’a’abal k’ajóoltbil Héroes de la salud tu k’iinil 29; u tse’ekil Retos y perspectivas del turismo rural en el Caribe Mexicano, tu k’iinil 30, ichil uláak’ ba’alo’ob.
Edición: Ana Ordaz
