Aj-áantaj máako’ob ti’ u lu’umil Australiae’ tu yáantajo’ob 88 u túul báayenaob k’a’al u beelo’ob ti’al u páajtal u bino’ob, chéen ba’axe’, ka’alikile’ táan xan u beeta’al meyajo’ob ti’al u luk’sa’al u wíinkilal 380 u túul uláak’ kimen ba’alche’oba’, ichil u jáal ja’il Tasmania.
Le jueves máanika’, kex junk’aal ti’ le ba’alche’oba’ láayli’ ti’ p’aatalo’obi’, le beetik yanchaj u luk’sa’al u kuxtal jaytúul ti’ leti’ob tumen aj-áantaj máako’ob.
Meyaj ti’al u yáanta’al ba’alche’obe’ k’a’abéetchaj u séeb beeta’al p’el úuchik u yila’alo’ob kex kamp’éel k’iino’ob paachili’, ka’aj k’a’al u beelo’ob tu saamil u chik’inil u petenil Tasmania, le beetik páatchaj u jeel ts’a’abal jaytúulo’ob tu beelo’ob ti’al u páajtal u biino’ob, chéen ba’axe’ táan u yila’ale’ asab ya’ab le ku kíimilo’obi’ tumen jach ma’ ma’alob u seen máan k’iin ti’ yano’obi’.
“Yaan jaytúul ba’alche’ob láayli’ kuxa’ano’obi’, ts’o’okole’ ktukultik je’el u páajtal u jeel ts’a’abalob ich ja’ ti’al u bino’ob”, beey tu ya’alaj Nic Deka, máax jo’olbesik Parques Naturales ti’ u lu’umil Tasmania. Beyxan tu tsolaje’, u meyajil aj-áantaj máako’obe’ “jach noj ba’al”, le beetik tak bejla’a viernese’ yaan u ts’o’oksik u meyajo’obi’.
