Xla’-Kaj, kúuchil yéetel u múuch’ meyajil ts’aatáantik u suuka’anil meyajo’ob maaya kaaj, ti’ eets’el tu kaajil Tihosuco, tu méek’tankaajil Felipe Carrillo Puerto, ts’o’okole’ ku meyajtik jejeláas ba’alo’ob ti’al ma’ u jáawal u beeta’al kool. José Alberto Poot Chablé, leti’ máax péektsiltik le meyaja’, ku ya’alike’ tak walkila’ jach óoli’ mina’an táankelemo’ob na’atik ba’axten k’a’anan u beeta’al kool, ts’o’okole’ yaan uláak’o’obe’ ma’ xan u yojelo’ob ba’axten jáaw u meyajta’al tumen u taataobi’, mix
xan tu k’ajóoltajo’obi’ tumen yanchaj u bino’ob táanxel tu’ux.
“Jach talam bix yanik ba’al, ts’o’okole’ chéen wa jayp’éel tu’ux ken p’áatak, tu’ux láayli’ k’a’anane’”, ku yaj óoltik.
Tu múuch’il meyaj Xla‘-Kaje’ ku kaxta’al ka péektsilta’ak meyajo’ob suuk u beeta’al ka’ach tumen kaaj, je’el bix kool.
Ba’axten túun ixi’ime’ k’a’anan ti’al kaaj. Josee’ ku núukik k’a’anan tumen wíinike’ ti’ ixi’im siijil.
K-óol. Ma’ili’ káajak bak’tun 13 ka’aj beeta’ab ixi’im wíinik, tumen táan u kaxta’al ka’ach ba’ax máakilo’ob bíin súutuk lu’umkabilo’ob te’e yóok’ol kaaba’, le beetik yuumtsilo’obe’ jejeláas bix úuchik u yáax beetik wíinik, ba’ale’ ma’ jóok’ tu beeli’, tak ka’aj tu ch’a’ajo’ob ixi’im, wa ka wilke’exe’ ixi’ime’ yaan jump’éel chan sak ch’aaj naats’ te’e tu’ux ku jéek’elo’, leti’ le ba’ax k’ajóolta’an beey “u puksi’ik’al ixi’im”, leti’e’ tu ku yantal kuxtal yéetel yaan u yóol ti’al u chíimpoltik u Yuumtsilo’ob, ts’o’okole’ yaan u puksi’ik’al, ti’ túun káaj kk’ajóolta’al beey “ixi’im máako’on”, ku ya’alik.
Edición: Ana Ordaz