Ikil u kaxta’al “ma’ u yantal xwo’okinile’” bejla’a viernese’ ma’ táan u beeta’al xíimbal suuk u yúuchul ti’al u k’a’ajsa’al ba’ax úuch ti’ k’iinil 2 ti’ octubre ti’ u ja’abil 1968, úuchik u káajal líik’saj t’aan tu k’íiwikil Plaza de las Tres Culturas tak Zocalo, beey úuchik u ya’alal tumen Ana Ignacia Rodríguez, Nacha, úuchik u tsikbaltik yaan u beetchajal u tse’ekil le ken u chuk las 5 tu taal u yáak’abtal, tu yúuchben kaajil Tlatelolco.
Kex tumen ma’ táan u seten péek máake’, u jala’achilo’ob Ciudad de Méixcoe’ ma’ táan u tukultiko’ob u tseliko’ob le mil u túul ajkanan kaajo’ob u túuxtmajo’ob u kaláanto’ob Zócalo.
Le beetike’, ti’ le k’iino’oba’ yaan u jach kaláanta’al u noj bejilo’ob Centro Histórico. Beey túuno’, ma’ xan táan u luk’sa’al xaak’al ku beeta’al ken okok wa ken jóok’ok máak tu bejilo’ob Madero, 20 de Noviembre, 5 de Febrero, Tacuba, 5 de Mayo, mix xan kanan ts’a’aban Pino Suárez yéetel Eje Central, ti’al beyo’ u kaláanta’al u kuxtal máax ku bin u yil ba’al te’elo’, wa máaxo’ob xan líik’sik u t’aani’.
Nacha, juntúul máax jo’olbesik péeksajil ku yantal yóok’lal ba’ax úuch ti’ ja’abil 68, ts’o’okole’ asab k’ajóolta’ane’, tu ya’alaj bine’, tu jets’ajo’ob ma’ táan u yantal péeksikubáajo’ob te’e ja’aba’ ti’al beyo’ ma’ yúuchul loobilaj ti’ mixmáak, tumen yaan xáan uláak’ máako’ob ku táakalo’obi’, máaxo’ob táaka’ano’ob ti’ Frente Nacional Anti-AMLO.
