Lik’ul u ja’abil 1990e’ ts’o’ok u sa’atal maanal ti’ u 50 por cientoil ti’ u kooralilo’ob kuxa’an ichil ba’axk’ajóolta’an beey Gran Barrera de Coral, tu lak’in u jáal ja’il Australia.
xak’al xook beeta’ab tumen u kúuchil Centro ARC de Excelencia para Estudios de Arrecifes de Coral (CoralCoE), tu jach ilaj bix yanik u múuch’ilo’ob koral yéetel beyka’aj u nuuktakilo’ob te’e Gran Barrera de Coralo’, ichil u ja’abil 1995 yéetel 2017. Ba’ax chikpaje’ tu ye’esaj beyka’aj ts’o’ok u xu’upul u múuch’ilo’ob koral te’elo’.
“Óoli’ tuláakal u jejeláasil koralo’obe’ p’íitchaj ti’ ja’ tu’ux ma’ jach taami’ beyxan tu’ux taam, ba’ale’ u ya’abil le táan u ch’eejelo’obe’ leti’e’ koral ramificado yéetel le yaan u wíinkilal beey mayakche’. Le je’elo’obo’, leti’e’ asab loobilta’abob úuchik u jach chokojtal u ja’il je’el bix juntéen yáax úuchuke’, le beetik tajan sakchaj u koralilo’ob ichil u ja’abil 2016 yéetel 2017”, beey úuchik u ya’alik jka’ansaj Terry Hughes, juntúul ti’ u yuumilo’ob le xak’al xook jts’a’ab k’ajóoltbil tu pik’il ju’unil Proceedings of the Royal Society B.
