El abrazo (The embrace), jump’éel oochel ku ye’esik juntúul siberianoil tigree u méek’majubáaj ti’ junkúul che’e’, jch’a’ab tumen jrusoil Sergey Gorshkov, ts’o’okole’ tu yóok’lale’ chíimpolta’ab beey Mejor Fotógrafo de Vida Silvestre del Año 2020, úucha’ak u beeta’al u 56 u téenal.
J-a’alabe’ xáanchaj bulukp’éel winalo’ob ti’al u páajtal u ch’a’abal oochel tumen Gorshkov, ts’o’okole’ yéeya’ab tumen junjaats máako’ob tu xak’altajo’ob kex 50 mil oochelo’ob. “Mix juntéen yáax yanaj jump’éel oochel je’el bix le je’elo’. U paakatil jump’éel súutuk ma’ séeba’an u jan ila’al ichil u ts’u’ le k’áaxo’”, beey tu ya’alaj máax jo’olbesik u múuch’il máako’ob xak’alt oochelo’ob, Roz Kidman Cox, úuchik u ts’a’abal k’ajóoltbil jump’éel k’a’aytajil ts’íib.
Oochele’ chíimpolta’ab tumen jach ya’ab ba’al ku chikbesik; juntúul ba’alche’ sajbe’entsil yanik u sa’atal ts’o’okole’ jach jeets’ óol yanik te’e oochelo’, tumen táan u méek’ik junkúul che’ ka’alikil u muts’maj u yich. Ken ila’ake’ “ku ye’esik yaan alab óol”, beey tu ya’alaj Tom Littlewood, máax jo’olbesik ciencia ti’ u kúuchil e’esjail, máax yaan tu ya’alaje’ “oochele’ ku ye’esikto’on bix u kuxtal k’áax yéetel kuuch yaan to’on ti’al k kaláantik”.
