María Adelaida Méndez Orozco máax yaan 69 u ja’abile’, leti’e’ yáax ko’olel jsúut diácona tu lu’umil Yucatán. Ba’ale’ yáax táanile’ tu máansaj junk’aal ja’abo’ob ichil najil k’uj romanail, tu kúuchil Templo de Nuestra Señora de la Consolación, k’ajóolta’an beey Monjas, ba’ale’ ka’aj tu yilaj ko’olelo’ob ku luk’ulo’ob yiknal u yíichamo’ob wa ku lo’oxolo’obe’, ma’atech u cha’abal u kóomulgaro’obe’ tu jets’aj u k’exikubáaj ti’ iglesia anglicana.
Je’el bix juntúul ko’olel ts’o’ok u k’aaba’intal diáconae’ yaan u páajtal u beetik okja’, u ts’o’oksik u beel máak yéetel u ts’áak xan liturgia, ba’alo’ob mix táan u yutstal u tukulkta’al u beeta’al ti’ le uláak’ najil k’uj tu’ux yáax yanchajij.
Méndez Orozcoe’ ku ya’alik iglesia anglicanae’ ts’o’ok u jelbesik bix u yilik ba’al: ts’o’ok u náachkunsik u tuukul, ba’ale’ ba’ax jach táaj uts tu yiche’, leti’ u táakbesa’al tuláakal máak yéetel mixmáak ku p’a’atal paachil chéen yóok’lal xiib wa ko’olel, wa ba’ax u preferenciail sexual.
También te puede interesar: Je'ets' lalaj 5 ti' septiembre beey u k'iinil máasewal ko'olel tu lu'umil México
