Ka’alikil te’e k’iino’oba’, u jala’achil jejeláas lu’umo’obe’ u jatsmajubáajo’ob tumen ma’ u ch’aob u t’aanil ti’ ba’ax ku beetbil yéetel u báakunail COVID-19e’, jts’a’ab k’ajóoltbile’, wa ka k’uchuk yantal jump’éel u no’ojanil ts’aake’, chéen junjaats’ u kajnáalilo’ob Unión Europea bíin béeyak u ts’a’abal ma’ili’ k’uchuk u ja’abil 2022, beey úuchik u ya’alal tumen jaytúul máaxo’ob táakano’ob ti’ Unión Europea.
Le je’ela’ táan u ya’alal kex tumen ts’o’ok u yantal 27 u p’éel noj lu’umo’ob, tu’ux kaja’an óoli’ 450 millonesil máako’ob, tu’ux k’áata’an maanal ti’ mil millonesil báakunail beeta’an tumen óoxp’éel noj mola’ayob beetik ts’aak.
Ts’o’okole’, táan xan u yantal u tsikbalil ti’al u yantal uláak’ mil millonesil báakuna beeta’an tumen uláak’ mola’ayob.
Ka’alikil táan u beeta’al noj meyajo’ob ti’al u páajtal u ts’o’oksa’al jump’éel no’ojan báakunaile’ aj xak’al xooko’obe’ ku ya’aliko’obe’ ma’ tuláakal bíin jach meyajnak tu beel.
“Ma’ táan u chukpajal u báakunail COVID-19 ti’al tuláakal kajnáalilo’ob yaan ti’al u ts’o’okbal 2021”, beey úuchik u ya’alik juntúul u ajmeyajil Comisión Europea ti’ jump’éel múuch’tambalil yéetel u díiplomatikoilo’ob UE.
Edición: Ana Ordaz