U yoochel ba’ax suuk u yila’al sáansamale’, ku beetik u k’a’ajsa’al ba’al yéetel ku péeksik u yóol máak, le beetik tukulta’ab u beeta’al jump’éel u báaxalil loteria ti’al maanal ti’ 35 mil paalal, ti’ u jaatsil xook inicial, preescolar yéetel primaria, ti’al beyo’ u páajtal u yúuchul kaambal yéetel u k’ajóolta’al uláak’ ba’alob ich maayat’aan, je’el bix úuchik u k’áatik ka beeta’ak tumen jala’ach Mauricio Vila Dosal.
U ajmeyajilo’ob Dirección Indígena de la Secretaría de Educación del Gobierno del Estado (Segey), tu beetaj jump’éel kaambal meyaj tu k’aaba’taj Aprende jugando y cantando con la lotería en lengua maya yéetel tsikbalta’ab jayp’éel tsoolilo’ob yéetel nu’ukbesajo’ob ti’al u k’a’abéetkunsa’al lóoteria tumen ajkaansajo’ob ken jo’op’ok u ts’áako’ob xook ti’ Internet.
“Ajkaansaj e’esik yéetel mu’uk’ankúunsik maayat’aane’ unaj mantats’ u túumbenkunsik bix u beetik ti’al beyo’ u páajtal u beetil u yantal u yóol yéetel u no’ojan nu’ukulilo’ob ti’al u kaansik mejen paalal; le beetike’ k’a’anan u yojéelta’al ba’ax unaj u yantal ti’al u péeksa’al u yóol xoknáalo’ob yéetel ti’al u páajtal u chóoltik u tuukulo’ob, beey tu ya’alaj Noemy Chel Ucán, máax ku meyaj ti’ Segey.
