de

del

Foto: Afp

Walkila’ táan u lúubul u yóol wíinik ichil meyajilo’ob táan u beeta’al ti’al u kaxta’al uláak’ máak láayli’ kuxa’an tu yáamil tuláakal le ba’ax níik úuchik tíitikubáaj lu’um le domingo máanika’, tu chik’inil Turquía. Ts’o’ok u máan ka’ap’éel k’iino’ob yéetel tak walkila’ ts’o’ok maanal ti’ 70 máak kíimik tu yóok’lal, ka’alikil ajáantaj máako’obe’ jujuntúulil u bin u jóok’siko’ob u wíinkilal máaxo’ob ts’o’ok u kata’alo’obi’.

Bayraklie’, leti’e’ kaaj tu’ux tajan loob úuchik u yantal ichil u baantail Esmirna, le beetik láayli’ u kaxta’al wa máax kuxa’ani’, ts’o’okole’ ma’ kunen ba’ax tu beetajo’obi’, tumen tu yáak’abil ka’awjeake’, kaxta’ab juntúul máak 70 u ja’abil, máax ts’o’ok 33 horas p’áatak tu yáanalil tuláakal ba’ax níiki’.

Tu taal u yáak’abtal viernes ka káaj u tíitikubáaj lu’um, ti’ jtaal tu k’áak’nabil Egeo, tu noojol-lak’inil Esmirna. Jach k’a’am úuchik. U’uya’ab tak Estambul yéetel Atenas, ts’o’okole’ tu beetaj xan u líik’il jump’éel chan tsunami, ka tu bulaj u kaajil Seferihisar.

U k’a’amil úuchik u tíitikubáaj lu’ume’, jp’i’is beey número 7, beey je’ets’ tumen Instituto Geofísico de Estados Unidos (USGS), yéetel máagnitud 6.6, je’el bix úuchik u ya’alik u jala’achilo’ob Turquía.